თეთრ სახლში განაცხადეს, რომ აშშ-ის პრეზიდენტი დონალდ ტრამპი არ გაკვირვებულა რუსეთის მიერ უკრაინაზე, განსაკუთრებით კი ენერგეტიკულ ობიექტებზე განხორციელებული ბოლო თავდასხმით.
ამის შესახებ თეთრი სახლის პრესმდივანმა ქეროლაინ ლევიტმა განაცხადა. იუწყება AFP
ლევიტმა აღნიშნა, რომ მან დღეს დილით რუსეთის დარტყმები განიხილა პრეზიდენტ ტრამპთან, რომელმაც გასულ კვირას განაცხადა, რომ რუსეთმა ერთი კვირით შეწყვიტა უკრაინის ენერგომატარებლებზე თავდასხმები.
„სამწუხაროდ, მისი რეაქცია იყო გაკვირვების გარეშე. ეს ორი ქვეყანა უკვე რამდენიმე წელია უკიდურესად სასტიკ ომს აწარმოებს - ომს, რომელიც არასდროს დაიწყებოდა, პრეზიდენტი [ტრამპი] ხელისუფლებაში რომ ყოფილიყო. ეს წინა პრეზიდენტის, ჯო ბაიდენის სისუსტისა და არაკომპეტენტურობის გამო დაიწყო“, - განაცხადა ლევიტმა.
დღეს უკრაინის პრეზიდენტმა ვოლოდიმირ ზელენსკიმ დღეს განაცხადა, რომ რუსებმა უგულებელყვეს შეერთებული შტატების თხოვნა და დაარღვიეს ენერგეტიკული ცეცხლის შეწყვეტის შეთანხმება, როდესაც 3 თებერვლის ღამეს უკრაინაზე ძლიერი თავდასხმა განახორციელეს.
„რუსებმა კვლავ არაფრად ჩააგდეს შეერთებული შტატების ძალისხმევები. ენერგეტიკასა და კრიტიკულ ინფრასტრუქტურაზე დარტყმებისგან თავის შეკავებაზე იყო შეერთებული შტატების პრეზიდენტის თხოვნა, იცით ამის შესახებ. ჩვენი სამომლაპარაკებლო გუნდების შეხვედრის დროს, ამერიკის პრეზიდენტი ამბობდა, რომ საჭიროა კვირის განმავლობაში დარტყმებისგან თავის შეკავება. ეს ძალიან მნიშვნელოვანი გადაწყვეტილება იყო. ფაქტობრივად ეს პარასკევს ღამე დაიწყო და დღეს ღამე რუსებმა, ჩვენი თვალსაზრისით, პირობა დაარღვიეს“, - განაცხადა ზელენ სკიმ.
