ირანში აქციაზე დაკავებული 26 წლის ერფან სოლთანი გირაოს სანაცვლოდ გაათავისუფლეს. ინფორმაცია AFP-ს სოლთანის ადვოკატმა განუცხადა.
ადვოკატ ამირ მოუსახანის თქმით, მისი კლიენტი2 მილიარდი თომანის ($12 600) ღირებულების გირაოს სანაცვლოდ "გუშინ გაათავისუფლეს და მან ყველა თავისი ნივთი დაიბრუნა, მათ შორის, ტელეფონიც".
ერფან სოლთანი 10 იანვარს, კარაჯის ფარდისში, საკუთარ სახლში დააკავეს. ირანის რეჟიმმა მას სიკვდილით დასჯა მიუსაჯა, რაც 14 იანვარს იყო დაგეგმილი. მოგვიანებით, 15 იანვარს გავრცელებული ინფორმაციით, ირანის სასამართლომ თქვა, რომ დაკავებული დემონსტრანტის, 26 წლის ერფან სოლთანის სიკვდილით დასჯა "საერთოდ არ იგეგმებოდა".
მოგვიანებით, ირანის რეჟიმმა უარყო, რომ სოლთანის სიკვდილით დასჯას გეგმავდა და განაცხადა, რომ მას "ქვეყნის შიდა უსაფრთხოებასთან დაპირისპირებასა და რეჟიმის წინააღმდეგ პროპაგანდისტულ აქტივობებში ედება ბრალი", რაც, დამტკიცების შემთხვევაში, სიკვდილით დასჯას არ ითვალისწინებს.
