სისტემური ავარიის შემდეგ, ენერგეტიკოსებმა უკრაინის ყველა რეგიონში ელექტროენერგიის მიწოდება აღადგინეს. ამის შესახებ უკრაინის პირველმა ვიცე-პრემიერმა და ენერგეტიკის მინისტრმა დენის შმიჰალმა განაცხადა.
„ყველა რეგიონი უბრუნდება თავის გრაფიკს, მაღალი ძაბვის ხაზები და ქვესადგურები ჩვეულ რეჟიმში მუშაობს. ენერგეტიკოსებმა რაც შეიძლება სწრაფად იმოქმედეს“, - დაწერა მან.
შმიჰალის თქმით, შაბათს დილით ერთმანეთისგან ერთი წუთის ინტერვალით ორი მაღალი ძაბვის ელექტროგადამცემი ხაზის გათიშვა მოხდა, რამაც უკრაინის შვიდ რეგიონში ელექტროენერგიის კასკადური გათიშვა გამოიწვია.
„კიბერშეტევის ან გარე ჩარევის შესახებ თეორიები არ დადასტურებულა. წინასწარი შეფასებით, ეს გამოწვეული იყო ხაზებისა და აღჭურვილობის გაყინვით“, - განაცხადა მინისტრმა.
შმიჰალმა დასძინა, რომ ყველაზე რთული სიტუაცია ქვეყნის ჩრდილოეთ და ცენტრალურ ნაწილში, ასევე ოდესის რეგიონში იყო.
„კიევში ელექტროენერგიის მიწოდების აღდგენაზე 64 ჯგუფი მუშაობს. გათბობის აღსადგენად 220 ჯგუფი უკვე მუშაობს. სამუშაოები გაგრძელდება ღამეც, რათა სითბო და განათება რაც შეიძლება სწრაფად აღდგეს“, - წერს შმიჰალი.
უკრაინის პრეზიდენტმა ვოლოდიმირ ზელენსკიმ საღამოს მიმართვაში განაცხადა, რომ კიევის სხვადასხვა რაიონში თითქმის 3 500 სახლი გათბობის გარეშეა დარჩენილი.
„კომუნალური სამსახურები და ენერგეტიკული კომპანიები გვპირდებიან, რომ ხვალ დილამდე გათბობის მდგომარეობას მაქსიმალურად გააუმჯობესებენ. თუმცა, ეს ტემპი უფრო სწრაფი უნდა იყოს“, - აღნიშნა მან.
„უკრენერგოს“ ცნობით, უკრაინის ენერგოსისტემაში სიტუაცია თანდათან სტაბილიზაციას იწყებს.
31 იანვრის დილით, უკრაინის მრავალ რეგიონში ელექტროენერგიის მიწოდება ელექტროქსელში მასშტაბური ავარიის გამო შეწყდა.
ელექტროენერგიის გათიშვის გარდა, პრობლემები იყო წყალმომარაგებასთან დაკავშირებითაც, დროებით არ მუშაობდა მეტრო.
ელექტროენერგიასთან დაკავშირებული პრობლემები შეიქმნა მეზობელ მოლდოვაშიც, სადაც ელექტრომომარაგება შეწყდა.
