ევროკავშირმა უკრაინისთვის ჰუმანიტარული დახმარების სახით 145 მილიონი ევრო გამოყო. ინფორმაციას ევროკომისიის პრესსამსახური ავრცელებს.
ევროკომისიის განცხადებით, დახმარება რუსეთის მიერ უკრაინის ენერგეტიკულ ინფრასტრუქტურაზე დარტყმების გაძლიერების ფონზე უკრაინელების თავშესაფრით, საკვებითა და მედიკამენტებით უზრუნველყოფას მოხმარდება.
ევროკავშირის მიერ გამოყოფილი თანხები გამოყენებული იქნება უკრაინელებისთვის დაცვის, საცხოვრებლის, საკვების, ფულადი დახმარების, ფსიქოსოციალური მხარდაჭერის, წყალზე წვდომისა და ჯანდაცვის უზრუნველსაყოფად.
„მომავალ კვირას კიევში ტემპერატურა შესაძლოა -24 გრადუსამდე დაეცეს. რუსეთი ცდილობს უკრაინელი ხალხის დამორჩილებას. ევროპა ამას არ დაუშვებს“, - განაცხადა ჰუმანიტარული დახმარებისა და კრიზისების მართვის საკითხებში ევროკომისარმა, აჯა ლაბიბმა.
ცალკე, ევროკომისია მოლდოვას 8 მილიონ ევროს გამოუყოფს ქვეყანაში ჩასული უკრაინელი ლტოლვილების მხარდასაჭერად.
„ჰუმანიტარული დახმარების პარალელურად, ევროკავშირმა უკრაინას 447 გენერატორი გადასცა. ასევე, დამატებით 500 გენერატორი გაიგზავნება“, - ნათქვამია ევროკომისიის განცხადებაში.
