უკრაინის საგარეო საქმეთა სამინისტრო ეხმიანება იტალიის ვიცე-პრემიერ მატეო სალვინის, რომელმაც უკრაინის პრეზიდენტს, ვოლოდიმირ ზელენსკის, რუსეთთან სამშვიდობო შეთანხმების ხელმოწერისკენ მოუწოდა.
უკრაინის საგარეო საქმეთა სამინისტროს წარმომადგენელმა, ჰეორჰი ტიხიმ, საპასუხოდ განაცხადა, რომ მეორე მსოფლიო ომის ერთ-ერთ ყველაზე სისხლიან ბრძოლაში - მონტე კასინოსთან - 3000-დან 5000-მდე უკრაინელი მონაწილეობდა და, მისი სიტყვებით, მათ „არ მოუწიათ დამარცხებასა და განადგურებას შორის არჩევანის გაკეთება“, მიუხედავად იმისა, რომ გამარჯვება ზოგჯერ შორს ჩანდა.
„ისინი სხვა მოკავშირეებთან ერთად იბრძოდნენ, რადგან იტალიისა და მთელი ევროპის თავისუფლება სასწორზე იდო. რაც არ უნდა რთული იყოს უკრაინის ბრძოლა დღეს, ის ისეთივე მნიშვნელოვანია, როგორც 80 წლის წინ იყო“, - წერს საგარეო საქმეთა სამინისტროს წარმომადგენელი.
მან მადლიერება გამოხატა იტალიისა და იტალიელების მიმართ, რომლებსაც, სალვინისგან განსხვავებით, „ესმით, რომ ევროპაში მშვიდობის ბედი უკრაინაში ბრძოლის ველზე წყდება“.
„თუ ბატონ ვიცე-პრემიერს სამშვიდობო შეთანხმება აღელვებს, ჩვენ ვურჩევთ მას მიმართოს არა უკრაინის პრეზიდენტს - ქვეყანას, რომელიც აგრესიისგან თავს იცავს - არამედ პუტინს, რომელმაც ეს ომი დაიწყო“, - წერს ტიხი.
შეგახსენებთ, იტალიის ვიცე-პრემიერმა უკრაინის პრეზიდენტ ვოლოდიმირ ზელენსკის მიმართა: „ჩემო მეგობარო, შენ აგებ ომს, კარგავ ხალხს, ავტორიტეტს და ღირსებას: რაც შეიძლება მალე მოაწერე ხელი სამშვიდობო ხელშეკრულებას“.
