აშშ-ის ვიცე-პრეზიდენტი ჯეი დი ვენსი თებერვალში სომხეთსა და აზერბაიჯანს ეწვევა, - ამის შესახებ აშშ-ის პრეზიდენტმა დონალდ ტრამპმა სოციალურ ქსელ Truth Social-ზე დაწერა.
ტრამპმა განაცხადა, რომ ვენსი ორივე ქვეყანას ეწვევა სამშვიდობო ინიციატივების განსამტკიცებლად და TRIPP-ის (ტრამპის მარშრუტი საერთაშორისო მშვიდობისა და კეთილდღეობისთვის) პროექტის წინსვლისთვის.
ტრამპმა მადლობა გადაუხადა ორი ქვეყნის ლიდერს მშვიდობის შეთანხმების მხარდაჭერისთვის.
„მინდა მადლობა გადავუხადო აზერბაიჯანის პრეზიდენტ ალიევს და სომხეთის პრემიერ-მინისტრ ფაშინიანს გასული წლის აგვისტოში მშვიდობის შეთანხმების მხარდაჭერისთვის. ეს იყო რთული ომი, რვა ომიდან ერთ-ერთი, რომლის დასრულებაც მოვახერხე, მაგრამ ახლა ჩვენ კეთილდღეობა და მშვიდობა გვაქვს.
თებერვალში ვიცეპრეზიდენტი ვენსი ორივე ქვეყანას ეწვევა, რათა ჩვენი სამშვიდობო ძალისხმევა გააძლიეროს და წინ წასწიოს ტრამპის მარშრუტი საერთაშორისო მშვიდობისა და კეთილდღეობისთვის.
ჩვენ გავაძლიერებთ ჩვენს სტრატეგიულ პარტნიორობას აზერბაიჯანთან, გავაფორმებთ უმშვენიერეს შეთანხმებას მშვიდობიანი ბირთვული თანამშრომლობის შესახებ სომხეთთან, დავდებთ გარიგებებს ჩვენი დიდი ნახევარგამტარების მწარმოებელი სექტორითვის და აზერბაიჯანს ამერიკაში წარმოებულ თავდაცვით აღჭურვილობას მივყიდით, როგორიცაა სხეულის დამცავი ჟილეტები, ნავები და სხვა“, - დაწერა ტრამპმა.
