აშშ-ის პრეზიდენტმა დონალდ ტრამპმა, დავოსში კანადის პრემიერ-მინისტრის, მარკ კარნის, გამოსვლაზე კომენტარის გაკეთებისას, განაცხადა, რომ კანადა შეერთებული შტატების წყალობით არსებობს.
მან ამის შესახებ მსოფლიო ეკონომიკურ ფორუმზე სიტყვით გამოსვლისას განაცხადა.
ტრამპმა გააკრიტიკა კანადის პრემიერ-მინისტრი, რომელმაც სამშაბათს დავოსში სიტყვით გამოსვლისას თქვა, რომ აშშ-ს ხელმძღვანელობით, წესებზე დაფუძნებული საერთაშორისო წესრიგი დასრულდა.
ამერიკის პრეზიდენტმა კანადის მთავრობის ხელმძღვანელს მიმართა და განაცხადა, რომ მისი ქვეყანა მხოლოდ შეერთებული შტატების წყალობით არსებობს.
„კანადა შეერთებული შტატების წყალობით ცხოვრობს. გახსოვდეს ეს, მარკ, შემდეგ ჯერზე, როცა განცხადებას გააკეთებ“, - თქვა ტრამპმა.
მან დასძინა, რომ კარნი „მადლიერი არ იყო“ აშშ-ს მიმართ, როდესაც მსოფლიო ეკონომიკურ ფორუმზე გამოვიდა.
ტრამპმა ასევე თქვა, რომ კანადა ბევრ უფასო შესაძლებლობას იღებს. მან იგულისხმა აშშ-ის მომავალ სარაკეტო თავდაცვის სისტემა, „ოქროს გუმბათი“, რომელიც ასევე დაფარავს კანადას.
„კანადა ბევრ უფასო საჩუქარს იღებს. ისინი მადლიერები უნდა იყვნენ, მაგრამ ასე არ არის“, - განაცხადა თეთრი სახლის ხელმძღვანელმა.
ცნობისთვის, კანადის პრემიერ-მინისტრმა, მარკ კარნიმ დავოსში, მსოფლიო ეკონომიკურ ფორუმზე სიტყვით გამოსვლისას განაცხადა: „არქტიკის სუვერენიტეტის საკითხში ჩვენ მტკიცედ ვდგავართ გრენლანდიისა და დანიის მხარეს, კატეგორიულად ვეწინააღმდეგებით გრენლანდიასთან დაკავშირებულ ტარიფებს“.
