ნატო-ს გენერალური მდივანი მარკ რუტე აცხადებს, რომ ალიანსისთვის ახლა მთავარი პრობლემა რუსეთის მიერ უკრაინის წინააღმდეგ წარმოებული ომია და არა გრენლანდიის გარშემო არსებული ვითარება. რუტემ ეს განცხადება დავოსში მსოფლიო ეკონომიკურ ფორუმზე გამოსვლისას გააკეთა. იუწყება The Guardian.
ნატოს გენერალურმა მდივანმა შეშფოთება გამოთქვა იმის შესახებ, „რომ შეიძლება რაღაც გამოგვრჩეს, თუ სხვა საკითხებზე გავამახვილებთ ყურადღებას“.
„რისკი იმაში მდგომარეობს, რომ თქვენ, რა თქმა უნდა, გრენლანდიაზე გაამახვილებთ ყურადღებას, რადგან ჩვენ უნდა უზრუნველვყოთ, რომ ეს საკითხი მშვიდობიანად მოგვარდეს. თუმცა, მთავარი საკითხი გრენლანდია არ არის. ახლა მთავარი საკითხი უკრაინაა“, - ხაზი გაუსვა მან.
რუტემ აღნიშნა, რომ რუსეთი ამჟამად ძლიერი ყინვის პერიოდში რაკეტებითა და დრონებით ანადგურებს უკრაინის ენერგეტიკულ სექტორს.
„ჩვენ ვიცით, რომ კიევში ახლა -20 გრადუსია. ჩვენ ვიცით, რომ უკრაინას ელექტროენერგიის საკუთარი მოთხოვნილებების მხოლოდ 60%-ის დაკმაყოფილება შეუძლია. და დიახ, მართალია, რომ დეკემბერში რუსები დღეში 1000 ადამიანს კარგავდნენ - არა მძიმედ დაჭრილებს, არამედ დაღუპულებს. დეკემბერში ეს 30 ათასზე მეტია... თუმცა ისინი კვლავ აგრძელებენ თავდასხმებს, კვლავ აძლიერებენ თავდასხმებს“, - დასძინა მან.
რუტემ ხაზი გაუსვა, რომ უკრაინას ახლა დასავლეთის მხარდაჭერა სჭირდება და დასძინა, რომ ევროპამ უნდა გააფართოვოს თავისი სამრეწველო ბაზა, რათა მზად იყოს მომავალში რუსეთის მხრიდან შესაძლო გამოწვევებისთვის.
