კიევში მილიონზე მეტი აბონენტი - ელექტროენერგიის, 4000-ზე მეტი მაღალსართულიანი კორპუსი კი გათბობის გარეშეა დარჩენილი, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

„დღევანდელი საღამოს მდგომარეობით, მხოლოდ კიევში ერთ მილიონზე მეტი მომხმარებელი ელექტროენერგიის გარეშეა. შენობების მნიშვნელოვანი რაოდენობა გათბობის გარეშეა – 4000-ზე მეტი საცხოვრებელი კორპუსი. ყველა ძალისხმევა სიტუაციის შემსუბუქებისკენ უნდა იყოს მიმართული. მთავრობის წარმომადგენლებმა უნდა წარმოადგინონ წინადადებები, როგორ დავიცვათ სიცოცხლე, როგორ დავეხმაროთ ჩვენს ხალხს, როგორ დავეხმაროთ ბიზნესს. საჭიროა ბიზნესთან მაქსიმალური კოორდინაცია: როგორ გადავანაწილოთ ელექტროენერგიის გამომუშავება, არსებული მოხმარება, რათა ხალხმა იგრძნოს სიტუაციის სტაბილიზაცია და რა დამატებითი დახმარების პროგრამებია საჭირო ადამიანებისთვის. ეს ყველაფერი დეტალურად უნდა იყოს განხილული და პასუხები უნდა გაეცეს იმ კითხვებს, რომლებიც დღეს მთავრობის წარმომადგენლებს დავუსვი. პირადი პასუხისმგებლობა მთავრობას ეკისრება – ხვალ ველოდები ქმედებებისა და გადაწყვეტილებების კონკრეტულ, მკაფიო ჩამონათვალს. ყოველი საათი ენერგეტიკის სექტორს უნდა დაეთმოს", - განაცხადა უკრაინის პრეზიდენტმა.

მისი თქმით, უკრაინის საჰაერო ძალების მასშტაბური რუსული საჰაერო თავდასხმის მოგერიების, კერძოდ, დრონების ჩამოგდების შედეგები არადამაკმაყოფილებელი იყო.

"კიევი ურთულეს მდგომარეობაშია. დღეს დილით, კიდევ ერთხელ „შაჰიდის“ დრონებმა რეგიონში ენერგეტიკულ ობიექტს დაარტყეს. საჰაერო ძალების მოქმედება „შაჰედების“ წინააღმდეგ არადამაკმაყოფილებელია. ჩვენ გვყავს გამანადგურებლები, მაგრამ საჰაერო ძალების ოპერაციების ორგანიზება განსხვავებული უნდა იყოს. ჩვენ ეს სიტუაცია თავდაცვის მინისტრთან განვიხილეთ", - განაცხადა ზელენსკიმ.

ცნობისათვის, გასულ ღამეს რუსმა ოკუპანტებმა უკრაინის წინააღმდეგ სხვადასხვა ტიპის 339 საფრენი აპარატი გაუშვეს. უკრაინის საჰაერო ძალებმა განაცხადეს, რომ მათ მტრის 315 დრონი ჩამოგდეს ან ჩაახშეს. საჰაერო ძალების ცნობით, შეტევის დროს 18 ბალისტიკური რაკეტიდან 14 ჩამოაგდეს. 4 რაკეტა, ენერგეტიკულ ობიექტებს მოხვდა.