ვენესუელას დროებითმა ხელისუფლებამ პარასკევს საპატიმროებიდან გაათავისუფლა ჩეხეთის რესპუბლიკის, უნგრეთის, ნიდერლანდების და გერმანიის მოქალაქეები. ამის შესახებ Reuters აღნიშნული ქვეყნების მთავრობებზე დაყრდნობით ავრცელებს.
გერმანიის საგარეო საქმეთა მინისტრმა იოჰან ვადეფულმა ვენესუელის ციხეებიდან სამი გერმანელის გათავისუფლების შესახებ განაცხადა.
მან ამას ბერლინსა და კარაკასს შორის „უფრო კონსტრუქციული ურთიერთობებისკენ“ მიღწეული „ჟესტი“ უწოდა.
ჩეხური მედიის ცნობით, ვენესუელაში ციხიდან ჩეხეთის ერთი მოქალაქე გაათავისუფლეს.
ის 2024 წელს დააკავეს, როდესაც ქვეყნის ხელისუფლებამ ვენესუელის ლიდერის, ნიკოლას მადუროს მკვლელობის შეთქმულების დაგეგმვაში დაადანაშაულა.
„რამდენიმე კვირის ინტენსიური მოლაპარაკებების შემდეგ, ჩვენ შევძელით მისი გათავისუფლების უზრუნველყოფა“, - განაცხადა ჩეხეთის საგარეო საქმეთა მინისტრმა პეტრ მაცინკამ და დასძინა, რომ ჩეხეთი მზადაა აღადგინოს დიპლომატიური ურთიერთობები ვენესუელასთან.
ნიდერლანდებმა და უნგრეთმა ასევე განაცხადეს ვენესუელის ციხიდან მათი მოქალაქეების გათავისუფლების შესახებ.
ვენესუელამ ამ კვირაში 400-ზე მეტი ადამიანის გათავისუფლების შესახებ განაცხადა.
თუმცა, ადამიანის უფლებათა დამცველი ჯგუფები აცხადებენ, რომ ეს რაოდენობა უფრო ნაკლებია.
