აშშ-ის იმიგრაციისა და საბაჟო სამსახურის (ICE) აგენტმა მინეაპოლისში ვენესუელის მოქალაქე დაჭრა. აგენტმა მას ფეხში ესროლა. ამის შესახებ აშშ-ის შიდა უსაფრთხოების დეპარტამენტი იტყობინება.
უწყების ცნობით, ფედერალურმა აგენტმა „თავდაცვითი“ გასროლა „სიცოცხლის დასაცავად“ მას შემდეგ განახორციელა, რაც „არალეგალმა ვენესუელელმა იმიგრანტმა“ დაკავებისას წინააღმდეგობა გაუწია.
დემოკრატების მიერ კონტროლირებადი მინესოტას შტატის ქალაქის ოფიციალურმა პირებმა მოსახლეობას სიმშვიდის შენარჩუნებისკენ მოუწოდეს.
„ჩვენ გვესმის, რომ არსებობს განრისხება“, - განაცხადეს ქალაქის ოფიციალურმა პირებმა. მათ კიდევ ერთხელ მოითხოვეს, რომ ICE-ის ოფიცრებმა დაუყოვნებლივ დატოვონ მინეაპოლისი და მთელი შტატი.
ინციდენტი მოხდა ერთი კვირის შემდეგ, რაც მინეაპოლისში ICE-ის აგენტმა სამჯერ ესროლა და მოკლა სამი შვილის დედა, 37 წლის რენე ნიკოლ გუდი, როდესაც ის საკუთარ მანქანაში იჯდა.
ინციდენტმა მთელი ქვეყნის მასშტაბით მასობრივი საპროტესტო აქციები გამოიწვია, მინეაპოლისის ქუჩებში ათასობით ადამიანი გამოვიდა. აშშ-ის შიდა უსაფრთხოების დეპარტამენტის ცნობით, მინეაპოლისში ICE-ის ოფიცრები სამსახურეობრივ ოპერაციებს ატარებდნენ, როდესაც რამდენიმე ადამიანმა მათთვის ხელის შეშლა დაიწყო, ხოლო ერთმა ქალმა ICE-ის ოფიცრებისთვის მანქანით დაჯახება სცადა.
ამავდროულად, ქალაქის მერმა, ჯეიკობ ფრეიმ, ფედერალური აგენტების ქმედებებს „სახიფათო და უპასუხისმგებლო“ უწოდა.
მერმა განაცხადა, რომ ინციდენტის ვიდეო არ ადასტურებს ICE-ის ვერსიას.
