ირანმა ახლო აღმოსავლეთში აშშ-ის მოკავშირეები გააფრთხილა, რომ თუ ვაშინგტონი ირანს თავს დაესხმება, მათ ტერიტორიაზე განლაგებულ ამერიკულ ბაზებს დაარტყამს.

ამის შესახებ ირანის მაღალჩინოსანმა ანონიმურობის დაცვის პირობით Reuters-ს განუცხადა, მას შემდეგ, რაც პრეზიდენტი დონალდ ტრამპი მომიტინგეების მხარდასაჭერად ჩარევით დაიმუქრა..

„თეირანმა რეგიონის ქვეყნებს, საუდის არაბეთიდან და არაბთა გაერთიანებული საამიროებიდან დაწყებული თურქეთით დამთავრებული, განუცხადა, რომ აშშ-ის ბაზებს ამ ქვეყნებში თავს დაესხმებიან, თუ აშშ მიზანში ამოიღებს ირანს“, - განაცხადა ოფიციალურმა პირმა.

მისი თქმით, ირანის საგარეო საქმეთა მინისტრ აბას არაღჩსა და აშშ-ის სპეციალურ წარმომადგენელ სტივ უიტკოფს შორის პირდაპირი კონტაქტები შეჩერებულია, რაც მზარდი დაძაბულობის ასახვაა.

ამასთან, ისრაელელმა ოფიციალურმა პირმა Reuters-ს განუცხადა, რომ ისრაელის შეფასებით, ტრამპმა გადაწყვიტა ჩარევა, თუმცა ამ ქმედების მასშტაბი და დრო გაურკვეველი რჩება.

მეორე ისრაელურმა წყარომ, მთავრობის წარმომადგენელმა, განაცხადა, რომ პრემიერ-მინისტრ ბენიამინ ნეთანიაჰუს უსაფრთხოების კაბინეტს სამშაბათს გვიან ღამით მიაწოდეს ინფორმაცია ირანში რეჟიმის დაშლის ან აშშ-ის ჩარევის შანსების შესახებ.

უფლებადამცველი ორგანიზაციის ცნობით, ირანში არეულობის შედეგად დაღუპულთა რაოდენობამ თითქმის 2600-ს მიაღწია. ირანის რეჟიმი ცდილობს ჩაახშოს მთელი ქვეყნის მასშტაბით მიმდინარე საპროტესტო აქციები, რომლებიც 1979 წლის ისლამური რევოლუციის შემდეგ მათი ხელისუფლებისთვის ერთ-ერთ ყველაზე სერიოზულ გამოწვევას წარმოადგენს.