ისრაელი ირანში აშშ-ის შესაძლო ჩარევისთვის მაღალი დონის მზადყოფნაშია. ინფორმაციას Reuters სამ ინფორმირებულ წყაროზე დაყრდნობით ავრცელებს
ბოლო დღეებში აშშ-ის პრეზიდენტმა დონალდ ტრამპმა არაერთხელ განაცხადა, რომ თუ ირანის ხელისუფლება დემონსტრანტების მოკვლას დაიწყებს, ირანს დაარტყამს
Reuters-ის წყაროების ცნობით, აშშ-ის ჩარევის შესაძლებლობა ისრაელის უსაფრთხოების სამსახურებთან კონსულტაციების დროს განიხილეს, თუმცა არ დაუკონკრეტებიათ, თუ რა ზომებს გულისხმობს მზადყოფნის გაზრდა.
გარდა ამისა, მანამდე შედგა სატელეფონო საუბარი ისრაელის პრემიერ-მინისტრ ბენიამინ ნეთანიაჰუსა და აშშ-ის სახელმწიფო მდივან მარკო რუბიოს შორის, რომლის დროსაც განიხილეს ამერიკის ჩარევის შესაძლებლობა.
აღნშნული ინფორმაცია დაადასტურა წყარომ, რომელიც საუბარს ესწრებოდა.
გამოცემა Economist-თან ინტერვიუში, რომელიც პარასკევს გამოქვეყნდა, ნეთანიაჰუმ განაცხადა, რომ თუ ირანი თავს დაესხმება ისრაელს, ამას მისთვის საშინელი შედეგები მოჰყვება.
შეგახსენებთ, აშშ-ის პრეზიდენტმა გუშინ განაცხადა, რომ ირანი თავისუფლებას ეძებს და აშშ მზად არის დახმარებისთვის.
