ვენესუელის პრეზიდენტობის მოვალეობის შემსრულებლის, დელსი როდრიგესის ძმა და ეროვნული ასამბლეის პრეზიდენტი ხორხე როდრიგესი აცხადებს, რომ ვენესუელის ხელისუფლებამ გადაწყვიტა პატიმრების „მნიშვნელოვანი რაოდენობის“ გათავისუფლება, როგორც ვენესუელელების, ასევე უცხოელების.
როდრიგესი ამტკიცებს, რომ ეს გათავისუფლება იქნება კეთილი ნების ცალმხრივი აქტი, რომელიც არავისთან არ იქნება შეთანხმებული. მისი თქმით, გათავისუფლების პროცესი უკვე დაწყებულია.
ჯერჯერობით გაურკვეველია, კონკრეტულად ვისი გათავისუფლება იგეგმება, თუმცა ესპანეთის საგარეო საქმეთა სამინისტრომ უკვე განაცხადა, რომ გათავისუფლებულებს შორის ესპანეთის მოქალაქეებიც იქნებიან.
უწყების ხელმძღვანელმა, ხოსე მანუელ ალბარესმა, აღნიშნულს ვენესუელის ხელისუფლების მხრიდან „ძალიან პოზიტიური ნაბიჯი“ უწოდა.
ვენესუელის ოპოზიციის ლიდერმა, მარია კორინა მაჩადომ, ხუთშაბათს განაცხადა, რომ მადუროს დამხობამ შეუქცევადი პროცესი დაიწყო, რომელიც თავისუფალ ვენესუელამდე მივა.
