დიდი ბრიტანეთის თავდაცვის სამინისტრომ დაადასტურა, რომ დიდი ბრიტანეთი დაეხმარა აშშ-ს ტანკერ Bella 1/Marinera-ს დაკავების ოპერაციის დროს. ამის შესახებ The Guardian იუწყება.
„დიდი ბრიტანეთის შეიარაღებულმა ძალებმა წინასწარ დაგეგმილი ოპერატიული მხარდაჭერა, მათ შორის აშშ-ის სამხედრო აქტივების ბაზირებით, გაუწიეს აშშ-ის ძალებს, რომლებმაც აშშ-ის დახმარების მოთხოვნის შემდეგ, დიდ ბრიტანეთს, ისლანდიასა და გრენლანდიას შორის ტერიტორიაზე Bella 1 ჩაჭრეს. RFA Tideforce-მა მხარდაჭერა გაუწია აშშ-ის ძალებს, რომლებიც Bella 1-ის დევნისა და ჩაჭრის პროცესში იყვნენ, ხოლო სამეფო საჰაერო ძალებმა საჰაერო მეთვალყურეობა უზრუნველყო“, - ნათქვამია განცხადებაში.
აღნიშნულია, რომ დიდი ბრიტანეთისა და აშშ-ის თავდაცვისა და უსაფრთხოების ურთიერთობები „მსოფლიოში ყველაზე ღრმაა და დიდმა ბრიტანეთმა მხარდაჭერა საერთაშორისო სამართლის სრული დაცვით გაუწია“.
დიდი ბრიტანეთის თავდაცვის მინისტრმა, ჯონ ჰილიმ აღნიშნა, რომ გემს „საძაგელი ისტორია“ ჰქონდა და რუსეთ-ირანის სანქციების გვერდის ავლის ღერძის ნაწილი იყო, რომელიც ტერორიზმს, კონფლიქტსა და უბედურებას აღვივებს ახლო აღმოსავლეთიდან უკრაინამდე.
შეგახსენებთ, ორკვირიანი დევნის შემდეგ, შეერთებულმა შტატებმა ატლანტის ოკეანეში ვენესუელასთან დაკავშირებული, რუსულკი დრშის ქვეშ მცურავი ნავთობტანკერი Marinera დააკავა.
„დაკავება, რომელსაც შეეძლო რუსეთთან დაძაბულობის გაღვივება, მოხდა მას შემდეგ, რაც ტანკერმა, რომელიც თავდაპირველად Bella 1-ის სახელით იყო ცნობილი, თავი აარიდა სანქცირებული ტანკერების საზღვაო „ბლოკადას“ და აშშ-ის სანაპირო დაცვას ბორტზე ასვლაზე უარი უთხრა“, - იუწყება Reuters.
