საფრანგეთთან და უკრაინასთან ხელმოწერილი დეკლარაციის ფარგლებში ბრიტანული ძალების ნებისმიერი განლაგება ბრიტანეთის პარლამენტმა უნდა დაამტკიცოს, განაცხადა დიდი ბრიტანეთის პრემიერ-მინისტრმა კირ სტარმერმა. იუწყება Reuters.
„მე პარლამენტს ვაცნობებ სიტუაციის განვითარების შესახებ და თუ ხელმოწერილი დეკლარაციის შესაბამისად ჯარების განლაგება აუცილებელი გახდება, ამ საკითხს კენჭისყრაზე დავაყენებ“, - განაცხადა სტარმერმა.
მან აღნიშნა, რომ ჯარისკაცების რაოდენობა განისაზღვრება დიდი ბრიტანეთის სამხედრო გეგმებით, რომლებიც ამჟამად შემუშავების პროცესშია.
სტარმერმა ასევე განაცხადა, რომ შობის დღესასწაულზე ორჯერ ესაუბრა აშშ-ის პრეზიდენტ დონალდ ტრამპს უკრაინის უსაფრთხოების გარანტიებთან დაკავშირებით და კანონმდებლები დაარწმუნა, რომ ამერიკელებთან სრული კონსულტაციის გარეშე არანაირ ქმედებას არ განახორციელებს.
