დიდი ბრიტანეთის პრემიერ-მინისტრმა კირ სტარმერმა განაცხადა, რომ გრენლანდიის მომავალი დანიისა და თავად გრენლანდიის გადასაწყვეტია.
კირ სტარმერი დანიის პრემიერ-მინისტრის, მეტე ფრედერიკსენის განცხადებას გამოეხმაურა იმის შესახებ, რომ აშშ-ის პრეზიდენტმა, დონალდ ტრამპმა გრენლანდიის მიტაცების შესახებ მუქარა უნდა შეწყვიტოს.
„მე დანიის პრემიერ-მინისტრს ვეთანხმები და ის მართალია გრენლანდიის მომავალთან დაკავშირებით. გრენლანდიამ და დანიის სამეფომ უნდა გადაწყვიტონ გრენლანდიის მომავალი. დანია ნატო-ს მოკავშირეა და მნიშვნელოვანია, რომ გრენლანდიის მომავალი დანიისა და თავად გრენლანდიის მიერ გადაწყდეს“, – განაცხადა სტარმერმა.
შეკითხვაზე, ეტყოდა თუ არა ის პრეზიდენტ ტრამპს „ხელები შორს გრენლანდიიდან“, სტარმერმა განაცხადა „დიახ“.
შეგახსენებთ, აშშ-ის პრეზიდენტმა დონალდ ტრამპმა განაცხადა, რომ აშშ-ს ნამდვილად სჭირდება გრენლანდია. ტრამპმა აღნიშნა, რომ გრენლანდია რუსული და ჩინური გემებითაა გარშემორტყმული და შეერთებულ შტატებს ის თავდაცვისთვის სჭირდება.
