სლოვაკეთის პრემიერ-მინისტრმა რობერტ ფიცომ დაგმო ვენესუელაში ამერიკული სამხედრო ოპერაცია და მას საერთაშორისო სამართლის დარღვევა უწოდა. ფიცომ განცხადება Facebook-გვერდზე გამოაქვეყნა.
ფიცოს თქმით, ვენესუელაში ამერიკის სამხედრო ოპერაცია მეორე მსოფლიო ომის შემდეგ შექმნილი მსოფლიო წესრიგის მოშლის კიდევ ერთი დასტურია.
„საერთაშორისო სამართალი არ მოქმედებს, სამხედრო ძალა გამოიყენება გაერო-ს უშიშროების საბჭოს მანდატის გარეშე და ყველა, ვინც დიდი და ძლიერია, აკეთებს იმას, რაც სურს, საკუთარი ინტერესების დასაცავად“, - აღნიშნა მან.
„როგორც პატარა ქვეყნის პრემიერ-მინისტრმა, მკაცრად უნდა დავგმო საერთაშორისო სამართლის ასეთი დარღვევა, როგორც ეს გავაკეთე ერაყის ომის, კოსოვოს სუვერენულ სახელმწიფოდ არაღიარების, უკრაინაში რუსეთის სამხედრო ძალის გამოყენების ან ღაზაში სიტუაციის შეფასების შემთხვევაში“, - დასძინა სლოვაკეთის პრემიერ-მინისტრმა.
მან ასევე გამოთქვა ინტერესი, თუ როგორ უპასუხებს ევროკავშირი ვენესუელაზე თავდასხმას, „რაც დაგმობას იმსახურებს“.
„ან ის გმობს ვენესუელაში ამერიკის სამხედრო ძალის გამოყენებას და ამით თანმიმდევრულად ინარჩუნებს თავის პოზიციას უკრაინაში ომთან დაკავშირებით, ან, როგორც ყოველთვის, თვალთმაქცურად იქცევა“, - აღნიშნა ფიცომ.
