აშშ-ის პრეზიდენტმა დონალდ ტრამპმა ვენესუელის ტერიტორიაზე საჰაერო დარტყმების განხორციელება რამდენიმე დღის წინ დაამტკიცა. ამის შესახებ CBS News-ს ორმა ამერიკელმა ოფიციალურმა პირმა განუცხადა.
„პრეზიდენტმა ტრამპმა აშშ-ის სამხედროებს ვენესუელაზე სახმელეთო დარტყმების დაწყების ნებართვა ოპერაციის დაწყებამდე სულ რაღაც რამდენიმე დღით ადრე მწვანე შუქი აუნთო“, - წერს გამოცემა.
წყაროების ცნობით, სამხედრო მაღალჩინოსნებმა განიხილეს მისიის შობის დღესასწულის დროს ჩატარების შესაძლებლობა, თუმცა პრიორიტეტი მიენიჭა ნიგერიაში ISIS-ის სამიზნეების წინააღმდეგ აშშ-ის საჰაერო დარტყმებს.
შობის შემდგომ დღეებში აშშ-ის სამხედროებს დარტყმის განხორციელების მეტი შესაძლებლობა ჰქონდათ, თუმცა ოპერაცია უამინდობის გამო გადაიდო.
ოფიციალური პირების თქმით, აშშ-ის სამხედროებს მისიის წარმატებისთვის მაქსიმალურად ხელსაყრელი ამინდის პირობები სჭირდებოდათ.
ვენესუელის დედაქალაქ კარაკასში დღეს აფეთქებების ხმები ისმოდა, ქალაქის თავზე საჰაერო თავდაცვის სისტემები მოქმედებენ, ქუჩებში კი სამხედრო ტექნიკაა განლაგებული.
როგორც იტყობინებიან, თავდასხმა ვენესუელის თავდაცვის მინისტრის რეზიდენციასა და ქვეყნის დედაქალაქში მდებარე პორტზე განხორციელდა.
თეთრ სახლს ოპერაციასთან დაკავშირებით ოფიციალური კომენტარი არ გაუკეთებია, თუმცა, მედიის ცნობით, აშშ-ის პრეზიდენტმა დონალდ ტრამპმა ვენესუელაში არსებულ სამიზნეებზე, მათ შორის სამხედრო ობიექტებზე, დარტყმების განხორციელების ბრძანება გასცა.
