აშშ-ის პრეზიდენტმა დონალდ ტრამპმა განაცხადა, რომ კვირას, უკრაინის პრეზიდენტ ვოლოდიმირ ზელენსკისთან შეხვედრის წინ, რუსეთის პრეზიდენტ ვლადიმირ პუტინთან „კარგი და ძალიან პროდუქტიული“ საუბარი ჰქონდა. ამის შესახებ ტრამპი Truth Social-ში წერს.
„აშშ-ის დროით 13:00 საათზე უკრაინის პრეზიდენტ ზელენსკისთან შეხვედრამდე, რუსეთის პრეზიდენტ პუტინთან კარგი და ძალიან პროდუქტიული სატელეფონო საუბარი მქონდა,“ - წერს ტრამპი.
მან ასევე დასძინა, რომ პრესის წარმომადგენლები ზელენსკისთან შეხვედრაზე არიან მიწვეული.
პარალელურად, რუსეთის პრეზიდენტის პრესმდივანმა, დმიტრი პესკოვმა, საინფორმაციო სააგენტო „ტასს“ დაუდასტურა, რომ რუსეთისა და აშშ-ის პრეზიდენტებს, პუტინსა და ტრამპს შორის სატელეფონო საუბარი შედგა.
28 დეკემბრის ღამეს, უკრაინის დელეგაცია შეერთებულ შტატებში ჩავიდა პრეზიდენტ ზელენსკის და ტრამპის შეხვედრაში მონაწილეობის მისაღებად. შეხვედრა თბილისის დროით 22 საათზე დაიწყება.
