უკრაინის პრეზიდენტმა ვოლოდიმირ ზელენსკიმ ევროკომისიის პრეზიდენტ ურსულა ფონ დერ ლაიენთან საუბარი გამართა. ამის შესახებ ზელენსკიმ ტელეგრამ-არხზე განაცხადა.
„ჩვენ განვიხილეთ უკრაინის მდგრადობის მხარდაჭერისა და მოლაპარაკებების მაგიდასთან ჩვენი პოზიციის გაძლიერების მნიშვნელობა. ჩვენ ყველაფერს გავაკეთებთ ამისთვის. ასევე შევთანხმდით ჩვენს კონტაქტებზე უახლოეს დღეებში. მიუხედავად იმისა, რომ მთელი მსოფლიო შობის მოლოდინშია, ჩვენ ერთი დღითაც არ ვწყვეტთ მუშაობას ჩვენი საერთო მიზნისკენ - მშვიდობის მიღწევისა და უსაფრთხოების უზრუნველყოფისთვის“, - დაწერა ზელენსკიმ საუბრის შემდეგ.
მან ასევე მადლიერება გამოხატა რუსეთის მიერ სრულმასშტაბიანი შეჭრის პერიოდში გაწეული მხარდაჭერისა და დახმარებისთვის.
„გასულ კვირას ევროპის საბჭომ მიიღო გადაწყვეტილება უკრაინისთვის 2026-2027 წლებისთვის 90 მილიარდი ევროს ფინანსური დახმარების გამოყოფის შესახებ და ეს ჩვენთვის ძალიან მნიშვნელოვანია. ჩვენ დიდად ვაფასებთ ევროკავშირის მხარდაჭერას უკრაინის მიმართ ამ დიდწილად გადამწყვეტ დიპლომატიურ მომენტში. ამჟამად მიმდინარეობს მოლაპარაკებები, რომლებმაც შეიძლება რადიკალურად შეცვალოს სიტუაცია და მნიშვნელოვანია, რომ მშვიდობის მიზნით რუსეთზე სწორი ზეწოლა განხორციელდეს - ყველა პარტნიორის ერთობლივი ზეწოლა“, - აღნიშნა უკრაინის პრეზიდენტმა.
