Axios-ის ცნობით, ისრაელმა აშშ-ის პრეზიდენტ დონალდ ტრამპის ადმინისტრაცია გააფრთხილა, რომ ირანი შესაძლოა წვრთნების საფარქვეშ ისრაელზე დარტყმას ამზადებდეს. ამის შესახებ გამოცემა ინფორმაციას წყაროებზე დაყრდნობით ავრცელებს.
წყაროებმა აღნიშნეს, რომ მიუხედავად იმისა, რომ შეგროვებული მონაცემები მხოლოდ ირანის შიგნით ძალების გადაადგილებაზე მიუთითებს, ისრაელის თავდაცვის ძალებში ფრთხილი დამოკიდებულება ჰამასის მიერ 2023 წლის 7 ოქტომბერს მომხდარი მოულოდნელი შეჭრის შემდეგ გაზრდილია.
Axios-ის ერთ-ერთი წყაროს ცნობით, ისრაელის დაზვერვამ მსგავსი შეშფოთება ექვსი კვირის წინ გამოთქვა, მას შემდეგ, რაც ირანის რაკეტების გადაადგილება დააფიქისრა. თუმცა ამ გადაადგილებას რაიმე შედეგი არ მოჰყოლია.
„ირანის თავდასხმის შანსი 50%-ზე ნაკლებია, მაგრამ არავინ არის მზად რისკზე წავიდეს და უბრალოდ თქვას, რომ ეს მხოლოდ წვრთნებია“, - აღნიშნა ერთ-ერთმა ისრაელელმა წყარომ.
ამერიკელმა წყაროს თქმით, აშშ-ის დაზვერვას ჯერ არ აქვს არანაირი მინიშნება იმის შესახებ, რომ ირანის თავდასხმა გარდაუვალია.
როგორც წყაროებმა გამოცემას განუცხადეს, ისრაელის გენერალური შტაბის უფროსმა, გენერალ-ლეიტენანტმა ეიალ ზამირმა აშშ-ის ცენტრალური სარდლობის უფროსს, ადმირალ ბრედ კუპერს აცნობა, რომ ისრაელი შეშფოთებულია ისლამური რევოლუციის გუშაგთა კორპუსის (IRGC) მიერ რამდენიმე დღის წინ დაწყებული სარაკეტო წვრთნებით.
მათი თქმით, ზამირმა კუპერს უთხრა, რომ ირანის ბოლოდროინდელი სარაკეტო გადაადგილებები და სხვა ოპერატიული ნაბიჯები შესაძლოა მოულოდნელი თავდასხმის საფარს წარმოადგენდეს.
ზამირმა მოუწოდა ამერიკულ და ისრაელის ძალებს,თავიანთი ქმედებების მჭიდრო კოორდინაცია მოახდინონ თავდაცვისთვის მზადების პროცესში.
კუპერი კვირას თელ-ავივში იმყოფებოდა, სადაც სიტუაციის განსახილველად ზამირს და ისრაელის თავდაცვის ძალების მაღალჩინოსნებს შეხვდა.
გამოცემის ცნობით, ნეთანიაჰუს სურს განიხილოს ირანის მიერ ბალისტიკური რაკეტების შესაძლებლობების აღდგენის მცდელობები და ირანზე კიდევ ერთი დარტყმის შესაძლებლობა 2026 წელს.
ისრაელის წყაროებმა Axios-ს განუცხადეს, რომ ისრაელის დაზვერვა ირანის სარაკეტო შესაძლებლობების განახლებული ზრდის ადრეულ ნიშნებს ხედავს, რაც უფრო დიდი მოტივაციით ხასიათდება, ვიდრე ირანელებს ივნისში 12-დღიანი ომის შემდეგ ჰქონდათ.
