უკრაინის პრეზიდენტმა ვოლოდიმირ ზელენსკიმ განაცხადა, რომ სამშვიდობო დოკუმენტების ამჟამინდელი ვერსიები აღარ შეიცავს დესტრუქციულ ელემენტებს.
კერძოდ, ზელენსკიმ აღნიშნა, რომ დათმობების საკითხი აღარ არის აქტუალური.
თუმცა, უკრაინასა და რუსეთს განსხვავებული ხედვები აქვთ უკრაინის ტერიტორიების საკითხთან დაკავშირებით - რაც მოლაპარაკებების ყველაზე მტკივნეულ საკითხს წარმოადგენს.
ამის შესახებ ზელენსკიმ ბერლინში, გერმანიის კანცლერ ფრიდრიხ მერცთან ერთად გამართულ პრესკონფერენციაზე განაცხადა.
ზელენსკიმ განაცხადა, რომ „ბევრ საკითხში პროგრესია მიღწეული“.
ეს მიღწეული იქნა ამერიკულ დელეგაციასთან შეხვედრების დროს, მათ შორის აშშ-ის პრეზიდენტ დონალდ ტრამპის სიძესთან, ჯარედ კუშნერთან და ამერიკის პრეზიდენტის სპეციალურ წარმომადგენელთან, სტივ უიტკოფთან.
„სიმართლე გითხრათ, არ ვიცი, როგორ აღიქვამს აგრესორი [რუსეთი] ჩვენი საუბრების შედეგებს. მთავარია, რომ ჩვენი ხმა მოისმინეს. მნიშვნელოვანია, რომ ჩვენი აზრი მოისმინეს.
„მე ღრმად ვერკვევი ამ ომის დეტალებში და ძალიან მნიშვნელოვანია, რომ ჩემმა კოლეგებმა ამერიკის შეერთებული შტატებიდან მოისმინეს ყველა ეს დეტალი“, - აღნიშნა ზელენსკიმ.
ამავდროულად, უკრაინის პრეზიდენტმა გამოთქვა მოსაზრება, რომ ეს შეხვედრები უფრო ადრე რომ გამართულიყო, „პროგრესი კიდევ უფრო ღრმა იქნებოდა“.
ზელენსკი მადლიერება გამოთქვა ამერიკული დელეგაციის მიმართ მათი შესანიშნავი მუშაობისთვის.
„მნიშვნელოვანია, რომ აშშ-მა განიხილოს მე-5 მუხლის მსგავსი შეთანხმებები და შესაბამისი უსაფრთხოების გარანტიები. ამჟამად ვმუშაობთ, რომ ამ ყველაფერს წერილობითი ფორმა მივცეთ. ამ მხრივ პროგრესს მივაღწიეთ. ვხედავ დეტალებს, რომლებზეც მუშაობენ. ისინი საკმაოდ კარგად გამოიყურება, თუმცა ეს მხოლოდ პირველი ვერსიაა. ცეცხლის შეწყვეტის დროს მონიტორინგის საკითხი, ჩემი აზრით, უსაფრთხოების გარანტიების ნაწილია. მონიტორინგის საკითხი მოიცავს, თუ ვინ ჩაატარებს მონიტორინგს, რა ფორმატით და რა სანქციები მოჰყვება ცეცხლის შეწყვეტის მონიტორინგის დარღვევას. ეს არის საკითხები, რომლებიც მე წამოვწიე და მნიშვნელოვანია, რომ ყველა შევთანხმდეთ, რომ მათზე შემდგომი მუშაობაა საჭირო. ჩემი აზრით, ზოგიერთი რამ დამანგრეველია და ნამდვილად არ დაგვეხმარება და ჩემთვის მნიშვნელოვანია, რომ დღეს ისინი არ არის ჩვენი დოკუმენტების ახალ ვერსიებში. ეს ჩემთვის მნიშვნელოვანია, რადგან ღირსება მნიშვნელოვანია და დათმობების საკითხი ნამდვილად არ არის აქტუალური“ - თქვა ზელენსკიმ.
ამავდროულად, უკრაინის პრეზიდენტი მიიჩნევს, რომ ტერიტორიების საკითხი მტკივნეულია.
„იმიტომ, რომ რუსეთს სურს ის, რაც სურს... ჩვენ ნათლად გვესმის, რა სურთ მათ. შეიძლება გვჯეროდეს ან არა, მაგრამ 100%-ით ვიცით, რა სურთ მათ. მნიშვნელოვანია, რომ ამერიკელმა პარტნიორებმა ნათლად გაიგონ. ჩემთვის ყველაზე მნიშვნელოვანი უკრაინის მკაფიო პოზიცია იყო, ზედმეტი მძიმეებისა და წერტილების გარეშე“, - განაცხადა ზელენსკიმ.
მან დასძინა, რომ უკრაინასა და რუსეთს ტერიტორიებთან დაკავშირებით განსხვავებული პოზიციები აქვთ.
„ეს ასევე უნდა იქნას გაგებული და აბსოლუტურად ღიად განხილული. მოხარული ვარ, რომ ერთმანეთს მოვუსმინეთ“, - განაცხადა უკრაინის პრეზიდენტმა.
მისი თქმით, ამერიკული მხარე, როგორც შუამავალი, კვლავ შესთავაზებს სხვადასხვა ნაბიჯებს, რათა მიღწეული იქნას გარკვეული კონსენსუსი.
