სირიაში, ჩასაფრების შედეგად ორი ამერიკელი სამხედრო მოსამსახურე და ერთი ამერიკელი სამოქალაქო პირი დაიღუპა, დაჭრილია კიდევ სამი სამხედრო.
ამის შესახებ აშშ-ის ცენტრალური სარდლობა იუწყება. ასევე დამატებით დეტალებს ავრცელებს The Hill
ცენტრალური სარდლობის ცნობით, 13 დეკემბერს, „ისლამური სახელმწიფოს“ მებრძოლის თავდასხმის შედეგად ორი სამხედრო და ერთი ამერიკელი მშვიდობიანი მოქალაქე დაიღუპა, ხოლო სამი ჯარისკაცი დაიჭრა. საპასუხო ცეცხლის შედეგად თავდამსხმელი დაიღუპა, რომელიც მარტო მოქმედებდა.
„ოჯახების პატივისცემის ნიშნად და ომის დეპარტამენტის პოლიტიკის შესაბამისად, სამხედრო მოსამსახურეების ვინაობა არ გახმაურდება მათი ოჯახების ინფორმირებიდან 24 საათის განმავლობაში“, - აღნიშნა სარდლობამ.
სირიის მთავრობამ განმარტა, რომ ინციდენტი სირიის ქალაქ პალმირასთან პატრულირების დროს მოხდა.
პენტაგონმა განაცხადა, რომ ტერიტორიას სირიის ხელისუფლება არ აკონტროლებდა, პირველადი შეფასებები კი მიუთითებს, რომ თავდამსხმელი ISIS-თან იყო დაკავშირებული.
შეგახსენებთ, დეკემბრის დასაწყისში სირიის დიქტატორის, ბაშარ ალ-ასადის რეჟიმის დამხობიდან ერთი წელი შესრულდა.
ამის შემდეგ, დასავლეთის ქვეყნებმა დაიწყეს სირიასთან კონტაქტების აღდგენა, ასევე გამოთქვეს მოლოდინი ახალი მთავრობის პოლიტიკის მიმართ ურთიერთობების გაუმჯობესების შესახებ.
