აშშ-ის პრეზიდენტმა დონალდ ტრამპმა გარკვეული ოპტიმიზმი გამოთქვა აშშ-ისა და უკრაინის ოფიციალურ პირებს შორის კვირას ფლორიდაში გამართული მოლაპარაკებების მიმართ. მისი განაცხადებით „სამშვიდობო შეთანხმების“ „კარგი შანსი“ არსებობს, თუმცა ასევე აღნიშნა, რომ უკრაინაში არსებული „რამდენიმე რთული საკითხია“, რომელიც კორუფციას უკავშირდება.
ტრამპი ამის შესახებ Air Force One-ის ბორტზე ჟურნალისტებს ესაუბრა.
ტრამპმა აღნიშნა, რომ არსებობს „კარგი შანსი“, რომ დაიდოს შეთანხმება უკრაინაში რუსეთის ომის დასრულების შესახებ. თუმცა, პრეზიდენტის ადმინისტრაციის ხელმძღვანელის, ანდრიი ერმაკის გადადგომის კომენტირებისას, მან აღნიშნა, რომ უკრაინაში კორუფცია საქმეს არ აადვილებს.
ტრამპმა განაცხადა, რომ მოლაპარაკებები „მიმდინარეობს და კარგად მიმდინარეობს. ჩვენ გვსურს ადამიანების მკვლელობის შეჩერება“.
მან განაცხადა, რომ კვირას უკრაინელ ოფიციალურ პირებთან მოლაპარაკებების შემდეგ ესაუბრა აშშ-ის სახელმწიფო მდივანს, მარკო რუბიოს და სპეციალურ წარმომადგენელს სტივ უიტკოფს.
„მე მათთან ვისაუბრე და ისინი კარგ საქმეს აკეთებენ. უკრაინას რამდენიმე რთული პრობლემა აქვს, მაგრამ ვფიქრობ, რუსეთს სურს, რომ ეს დასრულდეს“, - განაცხადა ტრამპმა.
როდესაც ტრამპს სთხოვეს, დაეზუსტებინა, თუ რა იყო ეს „რთული პრობლემები“, მან მიუთითა „კორუფციულ სიტუაციაზე, რომელიც პრობლემის გადაჭრას ხელს არ უწყობს“.
ვფიქრობ, რომ დიდი შანსია, რომ შეთანხმებას მივაღწიოთ“,- თქვა მან.
ამასთან, ტრამპმა აღნიშნა, რომ მას მოლაპარაკებების დასრულების ბოლო ვადა ჯერ არ დაუდგენია.
