აშშ-ის სახელმწიფო მდივანი მარკო რუბიო კვირას ფლორიდაში უკრაინის დელეგაციასთან მოლაპარაკებებში მიიღებს მონაწილეობას, აშშ-ის პრეზიდენტის წარმომადგენელ სტივ უიტკოფთან და დონალდ ტრამპის სიძესთან, ჯარედ კუშნერთან ერთად.
ამის შესახებ Reuters ამერიკელ მაღალჩინოსანზე დაყრდნობით იუწყება.
Reuters აღნიშნავს, რომ უკრაინა ვაშინგტონის მხრიდან მნიშვნელოვან ზეწოლას განიცდის, რათა დათანხმდეს სამშვიდობო შეთანხმების პირობებს, მაშინ როდესაც პრეზიდენტი ვოლოდიმირ ზელენსკი 2022 წელს რუსეთის სრულმასშტაბიანი შეჭრის დაწყების შემდეგ ყველაზე რთულ პოლიტიკურ და სამხედრო სიტუაციაში იმყოფება.
შაბათს ცნობილი გახდა, რომ უკრაინის დელეგაცია, ეროვნული უსაფრთხოებისა და თავდაცვის საბჭოს მდივნის, რუსტემ უმეროვის ხელმძღვანელობით, შეერთებულ შტატებში გაემგზავრა „სამშვიდობო გეგმასთან“ დაკავშირებით მოლაპარაკებების გასაგრძელებლად.
