უკრაინის პრეზიდენტი ვოლოდიმირ ზელენსკი მიიჩნევს, რომ სრულიად შესაძლებელია უახლოეს დღეებში ამერიკულ მხარესთან ერთად ომის ღირსეული დასრულების მისაღწევად ნაბიჯები გადაიდგას. ამის შესახებ ზელენსკიმ ვიდეომიმართვისას განაცხადა.
„ამ საღამოს - ამერიკის დროით - უკრაინის დელეგაცია უკვე ამერიკის შეერთებულ შტატებში იქნება და დიალოგი ჟენევის პუნქტებზე დაყრდნობით გაგრძელდება. დიპლომატია აქტიურად მუშაობს. ამერიკული მხარე კონსტრუქციულ მიდგომას ავლენს და სრულიად შესაძლებელია უახლოეს დღეებში ნაბიჯების გადადგმა, რათა დადგინდეს, თუ როგორ უნდა დასრულდეს ომი ღირსეულად. უკრაინის დელეგაციას აქვს საჭირო დირექტივები და მე მოველი, რომ იმუშავებენ უკრაინის მკაფიო პრიორიტეტების შესაბამისად,“ - განაცხადა ზელენსკიმ.
ზელენსკიმ ასევე გამოაცხადა მზადება პარტნიორებთან მომავალი კვირის თანამშრომლობისთვის. „მათ შორის ჩვენი საჰაერო თავდაცვის გასაუმჯობესებლად და ჩვენ ძალიან ველით ჩვენი პარტნიორების დახმარებას“, - აღნიშნა ზელენსკიმ.
