29 ნოემბრის ღამეს უკრაინაზე რუსეთის კომბინირებული დარტყმის შედეგად სამი ადამიანი დაიღუპა და ათობით დაშავდა. ამის შესახებ უკრაინის პრეზიდენტი ვოლოდიმირ ზელენსკი Telegram-ზე წერს.
„ჩვენი საგანგებო სამსახურები მუშაობენ კიევსა და მიმდებარე რეგიონში რუსული დარტყმების ადგილებში. რუსებმა მოსახლეობის წინააღმდეგ დაახლოებით 36 რაკეტა და თითქმის 600 დრონი გაუშვეს. თავდასხმის მთავარი სამიზნეები ენერგეტიკული და სამოქალაქო ობიექტები იყო, რამაც საცხოვრებელი შენობები მნიშვნელოვნად დააზიანა და ხანძარი გამოიწვია. ამ დროისთვის ცნობილია ათობით დაშავებულისა და სამი დაღუპულის შესახებ,“ - წერს ზელენსკი.
პრეზიდენტმა აღნიშნა, რომ მუშაობა უნდა გაგრძელდეს დიდი ძალისხმევით, „იმისათვის, რომ უზრუნველვყოთ საკმარისი რაკეტები საჰაერო თავდაცვის სისტემებისთვის, რათა გვქონდეს ყველაფერი, რაც ჩვენი თავდაცვისთვის არის საჭირო და რუსეთზე ზეწოლა მოვახდინოთ“.
„დროა, ევროპამ გაყინულ აქტივებთან დაკავშირებით გადაწყვეტილება მიიღოს, თუ მოსკოვუ დრონებითა და რაკეტებით თავდასხმებზე უარს არ იტყვის. და ჩვენ აუცილებლად უნდა ვილაპარაკოთ ჩვენს ყველა პარტნიორთან ამ ომის დასრულების ნაბიჯებზე. მადლობა ყველას, ვინც გვეხმარება“, - თქვა ზელენსკიმ.
