რუსეთისა და ვლადიმირ პუტინის ქმედებები უკრაინაში მშვიდობის დამყარების არანაირ ნიშანს არ იძლევა. ამის შესახებ ესტონეთის საგარეო საქმეთა მინისტრმა, მარგუს ცაჰკნამ განაცხადა. ის სამშვიდობო შეთანხმებასთან დაკავშირებით სკეპტიკურად არის განწყობილი.
„ახლა ყოველდღიურად ვურთიერთობ ჩემს კოლეგასთან ანდრიი სიბიჰასთან და ბევრ სხვასთან. მგონია, რომ პუტინს ჰაერში სისხლის სუნი სცემს და მისთვის ეს ძალიან ხელსაყრელი ტაქტიკური მომენტია. ის ზეწოლას რაც შეიძლება მრავალი გზით ახორციელებს - ფრონტზე, მშვიდობიან მოსახლეობაზე, ინფრასტრუქტურასა და ენერგეტიკულ ობიექტებზე დარტყმებით. მშვიდობის ნიშნები ჯერ არ ჩანს“, - თქვა ცაჰკნამ.
თუმცა, მისი თქმით, პრეზიდენტი ტრამპი, პირიქით, ცდილობს უკრაინას სამშვიდობო შეთანხმება თავს მოახვიოს.
„და ეს პროცესი წარმოუდგენლად საჯაროა: ყველანაირი გაჟონვა, სატელეფონო ზარები, წინადადებები და კონტრწინადადებები. ინფორმაციის ასეთი ნაკადი იშვიათობაა. და მეორეც, თანამედროვე საგარეო პოლიტიკა ნამდვილად არ არის სუსტი ნერვების მქონე ადამიანებისთვის. ჩვენ აბსოლუტურად სიმშვიდე უნდა შევინარჩუნოთ და გავაგრძელოთ ჩვენი პოზიციების დაცვა“, - აღნიშნა მინისტრმა.
სამშვიდობო მცდელობებზე საუბრისას, ცაჰკნმა აღიარა, რომ რთულია იმის პროგნოზირება, წარუმატებლობული იქნება თუ არა ეს მცდელობები.
„უკრაინელების მთავარი გზავნილი იყო ის, რომ მათ სურთ, რომ პრეზიდენტი ტრამპი და შეერთებული შტატები ჩართულები იყვნენ. ლოგიკა მარტივია: შეგიძლიათ აშშ-სთან მოლაპარაკება აწარმოოთ, მაგრამ აშშ-ს გარეშე რუსეთზე ზეწოლა შეუძლებელია“, - თქვა მან.
ცაჰკნამ დასძინა, რომ სამშვიდობო შეთანხმების შესახებ ინფორმაციის ფართო ნაკადის მიუხედავად, მისი დეტალები უცნობია.
„ჩვენ ვიცით, რომ ნატო-ს და ევროკავშირის საკითხებს ცალ-ცალკე განიხილავენ - მათზე მოლაპარაკებებს არა პუტინი, არამედ ნატო და ევროკავშირი წარმართავენ. ყველა სხვა რთული საკითხი - უკრაინის კონსტიტუციური პრინციპები, ტერიტორია, ჯარების რაოდენობა, სუვერენიტეტის საკითხები, არჩევნები - ღიად რჩება“, - თქვა მან.
მისი თქმით, მაშინაც კი, თუ აშშ, უკრაინა და ევროპა რაიმე სახის გეგმას მიაღწევენ, მისი არსი იმაში უნდა იყოს, რომ პუტინმა შეცვალოს თავისი მიზნები.
„თუმცა, ჯერჯერობით მან ამისთვის მზადყოფნა არ გამოხატა და თავად გეგმაზე კომენტარი არ გაუკეთებია. ამიტომ, ვფიქრობ, რომ ჩვენ ჯერ კიდევ შორს ვართ მშვიდობისგან“, - აღნიშნა მინისტრმა.
ამასთან, ცაჰკნამ აღნიშნა, რომ რეალური სამშვიდობო გეგმა მხოლოდ ორი პუნქტისგან შედგება: რუსეთზე ზეწოლა და უკრაინის მხარდაჭერა.
