აშშ-ის „სამშვიდობო გეგმის“ ახალი ვერსიის თანახმად, ზაპოროჟიესა და ხერსონის ოლქებში ფრონტის ხაზი გაიყინება, თუმცა რუსეთი მაინც დაუბრუნებს უკრაინას ტერიტორიების გარკვეულ ნაწილს.
ამავდროულად, შეერთებული შტატები, როგორც ჩანს, ოფიციალურად აღიარებს ყირიმს და დონბასს რუსეთის ფედერაციის ნაწილად. ამის შესახებ Axios-ი ამერიკელ ოფიციალურ პირზე დაყრდნობით იუწყება.
გამოცემის წყაროს ცნობით, კიევისთვის დონბასის ნაწილის დათმობის შეთავაზებით, თეთრი სახლი იმ მოსაზრებას ეყრდნობა, რომ უკრაინა მაინც დაკარგავს ამ ტერიტორიას, თუ ომი გაგრძელდება.
„ამიტომ, უკრაინის ინტერესებშია, რომ შეთანხმება ახლავე იქნას მიღწეული “, - განაცხადა მან.
როგორც Axios იუწყება, მიუხედავად იმისა, რომ დონბასის ტერიტორიები „სამშვიდობო გეგმის“ მიხედვით რუსეთის კონტროლის ქვეშ მოექცევა, ისინი დემილიტარიზებულ ზონად გამოცხადდება და რუსეთი, სავარაუდოდ, იქ ჯარების განლაგებას ვერ შეძლებს.
რაც შეეხება ხერსონისა და ზაპოროჟიეს რეგიონებს, რომლებიც პუტინმა ასევე შეიტანა რუსეთის „კონსტიტუციაში“, იქ კონტროლის ხაზები „ძირითადად გაიყინება“.
ასევე ვრცელდება ინფორმაცია, რომ მოლაპარაკებების შემთხვევაში რუსეთი ტერიტორიის ნაწილზე უკრაინას კონტროლს დაუბრუნებს.
თუმცა, კონკრეტულად რომელ ტერიტორიებზეა საუბარი, არ არის დაკონკრეტებული.
აღსანიშნავია, რომ რუსეთი აკონტროლებს დნიპროპეტროვსკის, ხარკოვისა და სუმის ოლქების ნაწილებს, რომლებზეც კრემლს ოფიციალურად პრეტენზია ჯერ არ გამოუთქვამს.
გეგმის თანახმად, შეერთებული შტატები და სხვა ქვეყნები ყირიმს და დონბასს რუსეთის სუვერენულ ტერიტორიად აღიარებენ, მაგრამ იგივეს უკრაინისგან არ მოითხოვენ.
