სლოვაკეთის მთავრობამ განაცხადა, რომ უნგრეთის მსგავსად “როსნეფტსა” და “ლუკოილთან” დაკავშირებით აშშ-ის სანქციებისგან გათავისუფლება სლოვაკეთზეც ვრცელდება.
ამის შესახებ სლოვაკეთის ეკონომიკის მინისტრმა დენისა საკოვამ განაცხადა.
მან განმარტა, რომ გამონაკლისი ასევე ვრცელდება სლოვაკეთზე, რადგან ბრატისლავას ნავთობგადამამუშავებელი ქარხანა Slovnaft-ი უნგრულ კომპანია MOL-ს ეკუთვნის.
„ნავთობის შესყიდვის ყველა პროცედურა ერთი სახურავის ქვეშ, კომპანია MOL-ის ხელმძღვანელობით ხორციელდება. ეს ნიშნავს, რომ როდესაც უნგრეთმა აშშ-ის ადმინისტრაციისგან რუსული ნავთობის შესყიდვაზე ერთწლიანი თავისუფლება მიიღო, ეს ასევე გავრცელდება Slovnaft-ის მეშვეობით რუსული ნავთობის შესყიდვაზე, რადგან ის MOL-ის ჯგუფს ეკუთვნის“, - განაცხადა საკოვამ.
შეგახსენებთ, უნგრეთის პრემიერ-მინისტრი ვიქტორ ორბანი 7 ნოემბერს დონალდ ტრამპს შეხვდა. შეხვედრის შემდეგ ორბანმა განაცხადა, რომ აშშ-მა უნგრეთი რუსულ ნავთობთან დაკავშირებით სანქციებისგან გაათავისუფლა.
