შეერთებული შტატების სენატმა დაამტკიცა კომპრომისული კანონპროექტი, რომელიც მიზნად ისახავს ქვეყნის ისტორიაში ყველაზე ხანგრძლივი „შათდაუნის“ დასრულებას. ამის შესახებ Reuters იუწყება.
კანონპროექტი, რომელიც 60 ხმით მიიღეს, წინააღმდეგი კი 40 სენატორი იყო, საბოლოო განსახილველად წარმომადგენელთა პალატაში გადაიგზავნება.
კანონპროექტი აღადგენს 1-ელი ოქტომბრიდან შემცირებული ფედერალური სააგენტოების დაფინანსებას და შეაჩერებს პრეზიდენტ დონალდ ტრამპის კამპანიას ფედერალური პერსონალის შემცირების მიზნით, რაც 30 იანვრამდე ხელს შეუშლის სამსახურიდან ნებისმიერი სახის გათავისუფლებას.
შეთანხმება, რომელიც მთავრობას იანვრის ბოლომდე აფინანსებს, მას შემდეგ შედგა, რაც რესპუბლიკელები და ზოგიერთი დემოკრატი სენატორი შეთანხმდნენ ფედერალური თანამშრომლების სამსახურში დაბრუნებისა და აუცილებელი სერვისების აღდგენის შესახებ.
წარმომადგენელთა პალატაში კენჭისყრა, სავარაუდოდ, 12 ნოემბერს გაიმართება. დამტკიცების შემთხვევაში კანონპროექტს აშშ-ის პრეზიდენტს გაუგზავნიან, დონალდ ტრამპის ხელმოწერის შემდეგ კი ქვეყნის ისტორიაში ყველაზე ხანგრძლივი „შათდაუნი“ დასრულდება.
