ჟურნალისტმა ვასილ ივანოვ-ჩიქოვანმა ფოთის დროებითი მოთავსების იზოლატორი დატოვა.
მისი თქმით, რასაც ახლა აკეთებს რეჟიმი, ეს არის უკანონობა და უსამართლობა.
"უსამართლობის დაკანონება მიმართული არის მოქალაქეთა დაშინებისკენ, თუმცა მათ რომ არ გამოეტოვებინათ ის გაკვეთილი, სადაც ნიუტონის კანონს ასწავლიდნენ, ეცოდინებოდათ, რომ ყველა ქმედებას მოყვება უკუქმედება. შესაბამისად, ისინი როდესაც ცდილობენ, რომ აი ასე შეგვაშინონ, ჩვენ არ ვშინდებით. პირიქით, ამით ძალა გვემატება. დრეს ფოთის იზოლატორში რჩება მართლა ყველა პროფესიის ადამიანი. ჩემთან ერთად საკანში იჯდა მასწავლებელი, ისტორიკოსი, ასევე გვერდზე ზის ფინანსისტი, შეიძლება სხვადასხვა პოლიტიკური შეხედულების, თუმცა ყველას ერთი შეხედულება გვაერთიანებს, რომ ის რასაც ახლა აკეთებს რეჟიმი, ეს არის უკანონობა, უსამართლობა და აუცილებელია, რომ ამ უსამართლობას მოქალაქეები დავუპირისპირდეთ და წინ აღვუდგეთ", - განუცხადა ვასილ ივანოვ-ჩიქოვანმა "ტვ პირველს".
ვასილ ივანოვ-ჩიქოვანი და მისი მეუღლე მაიკო ბოკერია შინაგან საქმეთა სამინისტროს თანამშრომლებმა 24 ოქტომბერს დააკავეს. მათ შსს რუსთაველის გამზირის ხელოვნურად გადაკეტვას ედავებოდა.
თბილისის საქალაქო სასამართლომ ვასილ ივანოვ-ჩიქოვანი ადმინისტრაციულ სამართალდამრღვევად ცნო და მას 7-დღიანი ადმინისტრაციული პატიმრობა, ხოლო მის მეუღლეს 5000-ლარიანი ჯარიმა შეუფარდა.
