" Georgia media production group "-ის გენერალური დირექტორი გიორგი არველაძე "პენტ ჰაუს კლუბთან" რაიმე სახის კავშირს უარყოფს და გაზეთ "ქრონიკისთვის" სასამართლოში ჩივილს არ აპირებს.
როგორც "პენტ ჰაუს კლუბთან" დაკავშირებით ატეხილ სკანდალზე კომენტირებისას გიორგი არველაძემ "ჯი-ეიჩ-ენს" განუცხადა, "ეს გაზეთისთვის რეკლამა იქნება".
"თეორიულად არსებობს შანსი, რომ სასამართლოს მივმართო, პიროვნულად ამის სურვილიც მაქვს, მით უმეტეს, რომ ძალიან მარტივი იქნება საქმის ჩემს სასარგებლოდ გადაწყვეტა (იმდენად აბსურდულია სტატიის ავტორის მიერ მოყვანილი ფაქტები), მაგრამ, ალბათ, ასე არ მოვიქცევი. ეს არის ის, რაც "ქრონიკას" უნდა. სასამართლო განხილვის დაწყება მისთვის რეკლამა და სასიამოვნო პროცესი იქნება, ამიტომაც იგნორირებით ვუპასუხებ. ეს გაზეთი არც თავისი რეპუტაციით და არც არაფრით არ იმსახურებს იმას, რომ დიდი ყურადღება დავუთმო", - განუცხადა არველაძემ "ჯი-ეიჩ-ენს".
მისი განმარტებით, ის "ქრონიკის" ჟურნალისტის პასუხისგებას სხვა - ადამიანური ბერკეტებით შეეცდება.
"ჩემმა იურისტმა გაზეთის ხელმძღვანელობას უკვე მისწერა წერილი, რომელშიც "მაუწყებლობის შესახებ" კანონისა და "ქცევის კოდექსის" ის პუნქტებია ჩამოთვლილი, რომლებიც მათი ჟურნალისტის მიერ დაირღვა. იმედი მაქვს, ორგანიზაციის სპეციალური საბჭო მას განიხილავს და ობიექტურ გადაწყვეტილებას მიიღებს _ "ქრონიკა" ტყუილს აღიარებს, რაც მაგალითი იქნება იმისა, რამდენად ობიექტურია ეს საინფორმაციო საშუალება", - განმარტა არველაძემ.
"ჯი-ეიჩ-ენთან" საუბარში მან კიდევ ერთხელ უარყო "პენტ ჰაუს კლუბთან", როგორც მფლობელის, კავშირი და აღნიშნა, რომ "ქრონიკამ" "ამ ამბით მხოლოდ სკანდალის აწევა" სცადა.
"ამ კლუბის მფლობელი უკრაინის მოქალაქეა. ის მთელი ოჯახით საქართველოში აპირებს ჩამოსვლას და მალე ჩვენი ქვეყნის მოქალაქეობასაც მიიღებს. მას მოსწონს საქართველო და აქ ბიზნესის გაკეთება სურს. ერთ-ერთი ასეთი ბიზნესია "პენტ ჰაუსი". რაც შეეხება ამ კლუბთან ჩემს კავშირს, მხოლოდ იმაში გამოიხატება, რომ მის მეპატრონეს ვიცნობ. ამ ამბავში ჩემი სახელის იმ ფორმით გარევა, როგორც ეს "ქრონიკამ" გააკეთა, იაფფასიანი სპეკულაციაა", - დასძინა "იმედის" გენერალურმა დირექტორმა.
რაც შეეხება "ქრონიკას", ის ბოდიშის მოხდას და როგორც არველაძე განმარტავს, "ტყუილის" აღიარებას არ აპირებს. სკანდალური სტატიების ავტორი დიმიტრი ტიკარაძე აცხადებს, რომ მას იმის მტკიცებულებები, რომ "იმედის" გენერალური დირექტორი ნამდვილად "პენტ ჰაუსის" მფლობელია, ხელთ აქვს.
"არაფრის უარყოფას არ ვაპირებ. სამი სხვადასხვა წყაროდან მივიღეთ ინფორმაცია, რომ არველაძე ამ კლუბის რეალური და არა იურიდიული მფლობელია. გვაქვს აუდიოჩანაწერებიც, რომლებიც ჟურნალისტური გამოძიების პროცესში მოვიპოვეთ", - განუცხადა ტიკარაძემ "ჯი-ეიჩ-ენს", რომლის სკანდალური სტატიის მთავარი სკანდალი ისაა, რომ აღნიშნული კლუბი რეალურად ბორდელს წარმოადგენს.
"კლუბში მისვლისას ადმინისტრატორმა ქალების "აყვანა" შემომთავაზა და ფასებიც გამაცნო: 2 საათი - 300 დოლარი. ისიც კი მითხრა, რომ თუ გოგოსთან ერთად რამდენიმე საათს გავატარებდი, "ფასდაკლებაც" მეკუთვნოდა", - ამტკიცებს ტიკარაძე.
შეგახსენებთ, რომ "ქრონიკასა" და გიორგი არველაძეს შორის დაპირისპირება მეორე კვირაა გრძელდება. გაზეთის ჟურნალისტის მტკიცებით, "პენტ ჰაუსის" რეალური მფლობელი სწორედ " Georgia media production group "-ის გენერალური დირექტორი გიორგი არველაძეა, კლუბად "მონათლული" ეს დაწესებულებაა კი ბორდელს წარმოადგენს.
