პლასტიკის ბოთლებში ჩამოსხმული სასმლის რეალიზაციის რეგულირების საკითხების განხილვის მიზნით, გარემოს დაცვისა და სოფლის მეურნეობის მინისტრის მოადგილეები სოლომონ პავლიაშვილი, ზურაბ ეზუგბაია და კახა კაკაბაძე ბიზნესსექტორის წარმომადგენლებს შეხვდნენ.
„გარემოს დაცვისა და სოფლის მეურნეობის სამინისტრო აქტიურად მუშაობს პლასტიკის მოხმარების რეგულირების საკითხებზე. მოგეხსენებათ, საქართველო არაერთი კონვენციის მხარეა. ნარჩენების მართვის ეროვნული სტრატეგიის მიხედვით, 2030 წლამდე, საქართველო მიზნად ისახავს პლასტიკის ნარჩენების წარმოქმნის შემცირებას, რაც ხელს შეუწყობს გარემოზე ზემოქმედების შემცირებასა და ცირკულარული ეკონომიკის განვითარებას. ჩვენთვის მნიშვნელოვანია სექტორთან კოორდინირებული თანამშრომლობა და ისეთი რეგულაციის შემუშავება, რაც გარემოს და ჯანმრთელობის დაცვის საკითხებს და ეკონომიკურ ინტერესებს დააბალანსებს“, - განაცხადა სოლომონ პავლიაშვილმა.
როგორც შეხვედრაზე აღინიშნა, ახალი ინიციატივის ფარგლებში, იგეგმება საბიუჯეტო ორგანიზაციებისთვის (სამინისტროები, მათ სისტემაში შემავალი უწყებები, სახელმწიფოს წილობრივი მონაწილეობით შექმნილი საწარმოები, თვითმმართველობის ორგანოები, საგანმანათლებლო დაწესებულებები) და სტუმარ-მასპინძლობის სექტორისთვის სასმლის პლასტმასის ბოთლებით შესყიდვის აკრძალვა, რაც პლასტიკის მოხმარების შემცირებას ემსახურება.
ყურადღება გამახვილდა ახალ რეგულაციებზე გადასვლის ვადებზე. აღინიშნა, რომ სექტორის საჭიროებებისა და არსებული გამოწვევების დეტალური განხილვის მიზნით, შეხვედრები მომავალშიც გაგრძელდება.
