ჭიათურის მუნიციპალიტეტის მერიამ სოციალურ ქსელში გამოაქვეყნა ჭიათურობა 2025-ის აღსანიშნავი ღონისძიების ამსახველი ფოტოები, რომელთა შორის ერთ-ერთ ფოტოზე საქართველოს რუკა დროებით ოკუპირებული ტერიტორიების გარეშეა გამოსახული.
"დღეს ჭიათურაში ტრადიციული სახალხო დღესასწაული "ჭიათურობა 2025“ აღინიშნება.
ქალაქის მთავარ დღესასწაულთან დაკავშირებით იმართება მრავალფეროვანი ღონისძიებები. მოეწყო შემეცნებით-გასართობი სივრცეები, პერფორმანსები, ფლეშმობები და საგამოფენო კუთხეები, თეატრალიზებული წარმოდგენები, კულტურული და სპორტული აქტივობები.
ეთერ სამხარაძე-ჯღამაძის სკვერში ჩატარდა ლიტერატურული კომპოზიცია,რომელიც აფხაზეთში ვერაგულად მოკლული ჩვენი თანაქალაქელი პოეტის ეთერ სამხარაძე-ჯღამაძის ხსოვნას მიეძღვნა.
გამოიფინა ხელნაკეთი ნივთები, იმერულ ფაცხებში წარმოდგენილია ჭიათურის მუნიციპალიტეტის სოფლების (ადმინისტრაციული ერთეულების) საშემოდგომო-საგამოფენო სივრცეები.
ღონისძიებებს ჭიათურის მუნიციპალიტეტის მერი გივი მოდებაძე, ადგილობრივი ხელისუფლების წარმომადგენლებთან და მოწვეულ სტუმრებთან ერთად ესწრება.
დღის ბოლოს გაიმართება საპატიო ჭიათურელთა დაჯილდოება და ჩატარდება კონცერტი, რომელშიც მონაწილეობას მიიღებენ ადგილობრივი კოლექტივები და ჯგუფი "ურსა“." - წერს ჭიათურის მუნიციპალიტეტის მერია სოციალურ ქსელში.
მოქალაქეთა აღშფოთების შემდეგ, ფოტო ჭიათურის მერიის ფეისბუქგვერდიდან წაიშალა.
