უკრაინაში ომის გადაწყვეტა სწრაფად შეიძლება, თუ რუსეთისთვის მნიშვნელოვან სამ საკითხს გაითვალისწინებენ, ეს არის უკრაინის უსაფრთხოების გარანტიები, ტერიტორიები და უკრაინის ნეიტრალიტეტი - კრემლის სპეციალური წარმომადგენელი
კრემლის სპეციალურმა წარმომადგენელმა და რუსეთის პირდაპირი ინვესტიციების ფონდის ხელმძღვანელმა, კირილ დმიტრიევმა, რომელიც შეერთებულ შტატებში იმყოფება, განაცხადა, რომ უკრაინაში ომის გადაწყვეტის პოვნა „საკმაოდ სწრაფად“ შეიძლება, თუ რუსეთისთვის მნიშვნელოვან სამ საკითხს გაითვალისწინებენ.
დმიტრიევმა Fox News-თან საუბრისას განაცხადა, რომ „შეერთებულ შტატებს, უკრაინას და რუსეთს ესმით, თუ რა შეიძლება იყოს გამოსავალი და ჩვენ ვიმედოვნებთ, რომ ის გონივრულ ვადებში იქნება მიღწეული“.
წამყვანმა კითხვა დაუსვა, თუ რა შეიძლება იყოს გამოსავალი უკრაინაში ომის მოსაგვარებლად.
„მე ძირითადად ორიენტირებული ვარ ეკონომიკაზე, ინვესტიციებსა და აშშ-სთან საერთო ურთიერთობაზე და იმაზე, რომ დიალოგი გაგრძელდეს. მაგრამ მე ვფიქრობ, რომ არსებობს რამდენიმე ელემენტი. ერთ-ერთი მათგანი უკრაინის უსაფრთხოების გარანტიებია. და რუსეთმა თქვა „დიახ“, რუსეთი ღიაა უკრაინისთვის უსაფრთხოების გარანტიებისთვის.
ნამდვილად არსებობს საკითხი იმ ტერიტორიების შესახებ, სადაც რუსული მოსახლეობა ცხოვრობს და რომლებსაც უკრაინული ჯარები კონფლიქტის დაწყებამდეც კი დაესხნენ თავს.
და არსებობს უკრაინის ნეიტრალიტეტის საკითხი, რაც მნიშვნელოვანია რუსეთის უსაფრთხოებისთვის.
ანუ, განსახილველი საკითხები ბევრი არ არის. და რადგან ჩვენ გვესმის, თუ როგორ შეიძლება მათი დიპლომატიური გზით მოგვარება, გადაწყვეტის პოვნა საკმაოდ სწრაფად შეიძლება,“ - განაცხადა დმიტრიევმა.
დმიტრიევმა ასევე შეაქო აშშ-ის პრეზიდენტი დონალდ ტრამპი და აღნიშნა მისი პრეზიდენტობის დროს ომის მოგვარებაში „პროგრესი“.
„პირველ რიგში, პრეზიდენტმა ტრამპმა თავიდან აიცილა მესამე მსოფლიო ომში ესკალაცია. მეორეც, მან მიაღწია პირველ ზავს ენერგეტიკულ ინფრასტრუქტურასთან დაკავშირებით, რაც კი გვქონდა. და მესამე, მან ნამდვილად გაიგო რუსეთის პოზიცია“, - განაცხადა კრემლის წარმომადგენელმა.
CNN-ზე მან ასევე გამოთქვა მოსაზრება, რომ „ტრამპსა და პუტინს შორის შეხვედრა შედგება, თუმცა, სავარაუდოდ, მოგვიანებით“.
„ვფიქრობ, შეხვედრა გადაიდო - ჩვენმა დიპლომატებმა ის კარგად უნდა მოამზადონ“, - განაცხადა დმიტრიევმა.
24 ოქტომბერს დმიტრიევი შეერთებულ შტატებში ჩავიდა „ოფიციალური“ მოლაპარაკებებისთვის. აღნიშნული ვიზიტი მოჰყვა რუსეთის ნავთობსექტორის წინააღმდეგ სანქციების დაწესებას და დონალდ ტრამპსა და ვლადიმირ პუტინს შორის უნგრეთში დაგეგმილი სამიტის გაუქმებას.
