ხელისუფლების არათანმიმდევრული პოლიტიკის გამო საქართველოს სახელმწიფო ინტერესები ზარალდება.
ამის შესახებ "ქრისტიან-დემოკრატების" წევრმა, პარლამენტის ვიცე-სპიკერმა ლევან ვეფხვაძემ "ჯი-ეიჩ-ენთან" საქართველოს პრეზიდენტის მიხეილ სააკაშვილის მიუნხენის უსაფრთხოებაზე გამოსვლის შეფასებისას აღნიშნა.
"ამერიკას და ევროპას რუსეთის მოლაპარაკებების მაგიდასთან დაჯდომაზე მოწოდებები არ სჭირდება. ისინი ამას ისედაც აკეთებენ, რომ დაიყოლიონ დიალოგზე. ასეთ შემთხვევაში, როდესაც დასავლეთი ოფიციალურ მოსკოვზე ცდილობს ზეწოლა განახორცილოს, შენ ხელი არ უნდა შეუშალო, რასაც ამას ხელისუფლება აკეთებს. ორი კვირით ადრე ჯერ რუსეთის ხელისუფლების წარმომადგენლებს რეპტილიებს ეძახის და მერე დიალოგს სთავაზობს", - აღნიშნა ვეფხვაძემ.
მისივე შეფასებით, საქართველოს ხელისუფლების უმაღლესი პირების მხრიდან რუსეთის მისამართით ასეთი არათანმიმდევრული პოლიტიკის გამო ერთადერთი საქართველოს სახელმწიფო ინტერესები ზარალდება, რადგან მოლაპარაკების მაგიდასთან დაჯდომა ქართული მხარის ინტერესებში შედის.
"მოლაპარაკებების დაწყება ახლა ჩვენ გვჭირდება, თორემ რუსეთის ინტერესებში სტატუს ქვოს დარჩენა შედის", - აღნიშნა "ჯი-ეიჩ-ენთან" საუბრისას დეპუტატმა.
შეგახსენებთ, რომ საქართველოს პრეზიდენტმა მიხეილ სააკაშვილმა გუშინ მიუნხენის უსაფრთხოების კონფერენციაზე სიტყვით გამოსვლისას აღნიშნა, რომ ევროპისა და შეერთებული შტატების ჩართულობა გადამწყვეტია იმისთვის, რომ მას, ვინც მხოლოდ სამხედრო ძალის უზენაესობას აღიარებს, მოლაპარაკების მაგიდასთან დაჯდომა აიძულონ.
