აშშ-ის პრეზიდენტმა დონალდ ტრამპმა დაადასტურა, რომ მან ვენესუელაში ცენტრალურ სადაზვერვო სააგენტოს (CIA) საიდუმლო ოპერაციების ჩატარების ნებართვა მისცა და აღნიშნა, რომ შესაძლოა, სახმელეთო სამიზნეებზე თავდასხმებიც გააფართოვოს. ამის შესახებ The Washington Post იუწყება.
ოვალურ კაბინეტში რეპორტიორის შეკითხვაზე პასუხის გაცემისას, ტრამპმა არა მხოლოდ დაადასტურა ცენტრალური სადაზვერვო სააგენტოს ოპერაციების ავტორიზაცია, არამედ გამოთქვა მათი გაფართოების განზრახვაც.
„მე ორი მიზეზის გამო მივეცი თანხმობა: პირველი, მათ გამოუშვეს თავიანთი პატიმრები შეერთებულ შტატებში დამათ საზღვარი გადმოკვეთეს. ვენესუელიდან ბევრი ნარკოტიკი შემოდის, ბევრი ნარკოტიკი ზღვით შემოდის, მაგრამ ჩვენ მათ ხმელეთზეც გავაჩერებთ“, - თქვა ტრამპმა.
მან ასევე პირდაპირ განაცხადა, რომ განიხილება სამხედრო დარტყმები.
„ჩვენ, რა თქმა უნდა, განვიხილავთ ხმელეთზე დარტყმის შესაძლებლობას, რადგან ჩვენ ვაკონტროლებთ ზღვას“, - აღნიშნა პრეზიდენტმა.
ტრამპმა არ უპასუხა შეკითხვას, მისცა თუ არა მან ცენტრალურ სადაზვერვო სააგენტოს თვითგამოცხადებული პრეზიდენტის, ნიკოლას მადუროს დამხობის უფლება, როგორც ამას მისი ზოგიერთი მთავარი ეროვნული უსაფრთხოების მრჩეველი მოითხოვდა.
„ვფიქრობ, ვენესუელა დაძაბულობას განიცდის“, - განაცხადა ტრამპმა.
The New York Times-მა ადრე გაავრცელა ინფორმაცია, რომ ტრამპმა ხელი მოაწერა საიდუმლო დირექტივას, რომელიც ლათინური ამერიკის ნარკოკარტელების წინააღმდეგ პირდაპირი სამხედრო მოქმედებების დაწყების საშუალებას იძლევა, რომლებსაც მისი ადმინისტრაცია უცხოურ ტერორისტულ ორგანიზაციებად აკვალიფიცირებს.
მიუხედავად იმისა, რომ ცენტრალური სადაზვერვო სააგენტოს ახალი უფლებამოსილებების დეტალები გაურკვეველი რჩება, წყაროებმა The Washington Post -ს აცნობეს, რომ ნარკოკარტელების წინააღმდეგ ბრძოლის ფარგლებში სააგენტომ უკვე გაზარდა თავისი ყოფნა კარიბის ზღვის აუზსა და ცენტრალურ ამერიკაში.
