სახელმწიფო უსაფრთხოების სამსახურის თანამშრომლებმა რუსთავის ციხე დატოვეს.
პაატა ბურჭულაძის ადვოკატის, შოთა თუთბერიძის განცხადებით სუს-ის თანამშრომლები კითხვებს თბილისთან ახლოს ტყეში დამარხულ იარაღებზე სვამდნენ. მისი განმარტებით, ამ საკითხთან დაკავშირებით პაატა ბურჭულაძეს არავითარი ინფორმაცია არ აქვს.
"პაატა ბურჭულაძესთან იყო სახელმწიფო უსაფრთხოების დეპარტამენტი, როგორც აგვიხსნეს საქმე ეხებოდა სადღაც ჩამარხული იარაღის ფაქტს, რასთან დაკავშირებითაც, ბუნებრივია, არავითარი ინფორმაცია პაატა ბურჭულაძეს არ აქვს.
ამასთან, დავაფიქსირეთ გამოკითხვის ოქმში ის, რომ ის არის პოლიტიკური ტყვე, პოლიტიკური პატიმარი, მის მიმართ მიმდინარეობს პოლიტიკური დევნა, მის მიერ კანონის ფარგლებში გაკეთებული განცხადებები არის უკვე გამოყენებული მის წინააღმდეგ, შესაბამისად არსებობს რისკი, რომ ნებისმიერი ჩვენება, ან ინფორმაცია, რომელსაც იგი მისცემს, მითუმეტეს ასე დაუგეგმავად, ასე უცბად მოსვლით, შეიძლება იქნეს გამოყენებული პოლიტიკური მართლმსაჯულების პირობებში მის წინააღმდეგ, შესაბამისად ამ ეტაპზე, ჩვენების მიცემაზე ბურჭულაძემ, მათ შორის სუს-ისთვის განაცხადა უარი.
ამასთან, პროცესმა ჩაიარა მშვიდად, თანამშრომლების ქმედებები იყო კანონის შესაბამისი, პროცედურები იყო სრულად დაცული, ამ მიმართულებით ჩვენ არანაირი ჩივილები არ გვაქვს, უბრალოდ, ბუნებრივია ასე მოსვლა, ღამის საათებში, ადვოკატის გაუფრთხილებლად არის პრობლემა, რომელიც ჯერ კიდევ დგას. თუმცა მადლობა, თანამშრომლებსაც და ბატონ პაატასაც, რომელიც ამ სიტუაციაში არ დაიბნა, რომ მოვასწარი მოსვლა სანამ გამოკითხვის პროცესი დასრულდებოდა. თუმცა კიდევ ერთხელ აღვნიშნავ, არავითარი კანონდარღვევის პოტენციალი არ შემიმჩნევია თანამშრომლებში, რისთვისაც ისინი იმსახურებენ ჩვენგან მადლობას.
ბატონ პაატას და მე ამაზე საუბრისთვის თავისუფალი დრო არ გვქონია, თუმცა ჩემი აზრით, ეს არის იმ სპექტაკლის გაგრძელება, რომელსაც "ქართული ოცნება" ცდილობს, ისინი ცდილობენ გარკვეული პუტჩის ძიებას და შექმნეს, როგორც თავის დროზე საბჭოთა კავშირი დროს შეიქმნა ექიმების საქმე, მეგრელების საქმე და ა.შ.. ძალიან უპერსპექტივო საქმე არის მდინარაძეს მინდა ვუთხრა, არის სრული სისულელე, მასზე სიცილის გამოწვევის მეტი არაფერი არ შეუძლია - მიხვიდე პაატა ბურჭულაძესთან და კითხო ტყეში იარაღი ხომ არ დამარხა, ეს არის სისულელე წმინდაწყლის. არავითარი რელევანტურობა პაატა ბურჭულაძეს ამ საქმესთან არ აქვს. მე პირადად მგონია, რომ მეს საქმე არის შეთითხნილი, ეჭვი მეპარება, რომ რეალური იყოს, თუმცა როგორც ჩანს "ქართული ოცნების" პროპაგანდონისტული ტელევიზიები აგრძელებენ ამ პიარით კვებას, თავიანთი მომხრეების იმ ნაწილის, რომელსაც მარტივად ატყუებენ. იმედი მაქვს, რომ ყველა თავის დროზე მოეგება გონს," - განუცხადა შოთა თუთბერიძემ "ტვ პირველს".
