ისრაელისთვის დიდებული დღეა, ღვთის დახმარებით ყველა მძევალს სახლში დავაბრუნებთ, – ასე გამოეხმაურა ისრაელის პრემიერ-მინისტრი, ბენიამინ ნეთანიაჰუ ისრაელსა და „ჰამასს“ შორის გაფორმებულ შეთანხმებას.
მისი განცხადებით, ხუთშაბათს მთავრობას შეკრებს „შეთანხმების დასამტკიცებლად და ყველა მძევლის სახლში დასაბრუნებლად“.
„ისრაელისთვის დიდებული დღეა. ხვალ მოვიწვევ მთავრობას, რათა დაამტკიცოს შეთანხმება და ჩვენი ყველა ძვირფასი მძევალი სახლში დააბრუნოს. მადლობას ვუხდი ისრაელის თავდაცვის ძალების გმირ ჯარისკაცებსა და უსაფრთხოების ძალებს, რომელთა გამბედაობისა და თავგანწირვის წყალობითაც მივაღწიეთ ამ დღეს. მთელი გულით მადლობას ვუხდი პრეზიდენტ ტრამპს და მის გუნდს ჩვენი მძევლების გათავისუფლების ამ წმინდა მისიის მობილიზებისთვის. ღმერთის დახმარებით, ერთად გავაგრძელებთ ჩვენი ყველა მიზნის მიღწევას და ჩვენს მეზობლებთან მშვიდობის გაფართოებას. ღვთის დახმარებით, ჩვენ ყველას სახლში დავაბრუნებთ“,- წერს ნეთანიაჰუ.
შეგახსენებთ, აშშ-ის პრეზიდენტმა დონალდ ტრამპმა ისრაელსა და ჰამასს შორის სამშვიდობო გეგმის პირველი ფაზის ხელმოწერის შესახებ განაცხადა, რომელიც, ყველა მძევლის სწრაფ გათავისუფლებას და ისრაელის ჯარების გაყვანას მოიცავს.