აშშ-ს სახელმწიფო მდივანმა ჰილარი კლინტონმა და რუსეთის საგარეო საქმეთა მინისტრმა სერგეი ლავროვმა მიუნჰენში სტრატეგიული შეტევითი შეიარაღების შემცირების შესახებ ახალი ხელშეკრულების სარატიფიკაციო სიგელები გაცვალეს. ამით აღნიშნული ხელშეკრულება ძალაში შევიდა.
აღსანიშნავია, რომ რუსეთის პრეზიდენტმა დიმიტრი მედვედევმა სტრატეგიული შეტევითი შეიარაღების შემცირების შესახებ კანონის რატიფიკაციას ხელი 28 იანვარს, 1 თებერვალს კი სარატიფიკაციო სიგელს მოაწერა. სარატიფიკაციო სიგელების გაცვლის შემდეგ სტრატეგიული შეტევითი შეიარაღების შემცირების შესახებ შეთანხმება ძალაში შედის.
შეგახსენებთ, რომ სტრატეგიული შეტევითი შეიარაღების ხელშეკრულების რატიფიცირება აშშ-მ 3 თებერვალს მოახდინა. დოკუმენტს ხელი აშშ-ის პრეზიდენტმა ბარაკ ობამამ მოაწერა.
აშშ-ის პრეზიდენტმა სენატს და კონგრესს გაუგზავნა წერილი, რომ შეასრულებს კანონმდებლების ყველა მოთხოვნას, რომელიც ასახულია რატიფიცირების რეზოლუციაში.
დემოკრატებმა შეძლეს შეენარჩუნებინათ რეზოლუციის ნეიტრალური ხასიათი, თუმცა დოკუმენტში ორი შესწორება შეიტანეს.
სენატორებმა ადმინისტრაციისგან მოითხოვეს, განსაკუთრებული ყურადღება მიექცეს აშშ-ის ბირთვული უსაფრთხოების მოდერნიზაციას და გაიმართოს მოლაპარაკებები რუსეთთან ტაქტიკური ბირთვული შეიარაღების მხრივ არსებული დისპარიტეტის აღმოსაფხვრელად.
საბოლოოდ რეზოლუციაში აშშ-ის ადმინისტრაციას ევალება ოფიციალურად განაცხადოს, რომ სტრატეგიული შეტევითი შეიარაღების შემცირება აშშ-ის მხარეს არ ავალდებულებს რაიმე სახის შეზღუდვებს რაკეტსაწინააღმდეგო სისტემის შექმნაში.
ასევე, აშშ ავტომატურ რეჟიმში არ მიაწოდებს რუსეთს აბსოლუტურად ყველა ტელემეტრულ ინფორმაციას, რაკეტების გაშვებასთან დაკავშირებით.
