ევროკავშირის სამეთვალყურეო მისიის ხელმძღვანელის ჰანს იორგ ჰაბერის განცხადებით, აფხაზეთში მდებარე ილორის წმინდა გიორგის სახელობის ეკლესია "გარუსულებული" არ არის.
"ამ საქმის სპეციალისტი არ ვარ, მაგრამ ეკლესიის გარეგნული დათვალიერების შედეგად, მას გარუსულება ვერ შევნიშნე. ეკლესიის წინამძღვარს უნდა, რომ ეკლესია მორწმუნეებს შეუნარჩუნოს და ცდილობს ეკლესია გადაარჩინოს დანესტიანებას. სწორედ ამ პროცესში აღიმართა გუმბათი და ეს შესაძლოა იმსახურებდეს კიდეც კრიტიკას... მაგრამ, ვფიქრობ, უმთავრესია ის, რომ ისევ იქ არის ქართველთა საფლავების ქვები - არც სადმე წაუღიათ და არც გაუნადგურებიათ. ეკლესიაშია ქართულწარწერიანი ხატები. ეკლესიის უძველეს ნაწილში არსებული ფრესკები კი 1957 წელს არის აღდგენილი, როცა შესაძლებელი არ იყო რესტავრაციის უმაღლესი სტანდარტებით ჩატარება. ვფიქრობ, ძეგლის გადასარჩენად ადამიანები აკეთებდნენ იმას, რისი გაკეთებაც იმხანად შეეძლოთ... თუკი ამ ეკლესიას ახლა ხელოვნებათმ ცოდნეს ანახებთ, შესაძლოა მან სხვა დასკვნები გამოიტანოს... მაგრამ მე ვხედავ მისი (ეკლესიის) შენარჩუნების გულწრფელ მცდელობას და აშკარაა, რომ ის არ არის გარუსულებული", - განუცხადა რადიო "თავისუფლებას" ჰაბერმა, რომელიც აფხაზეთიდან ორი დღის წინ დაბრუნდა.
ევროკავშირის სამეთვალყურეო მისიის ხელმძღვანელი აფაზეთის დე ფაქტო რესპუბლიკას 31 იანვრიდან 2 თებერვლის ჩათვლით სტუმრობდა და როგორც თავად მარიონეტული რეჟიმის ლიდერები აცხადებენ, ეს მისი არაოფიციალური, ტურისტის რანგში ვიზიტი იყო.
აღსანიშნავია, რომ ჰანს იორგ ჰაბერმა ილორის ეკლესია აფხაზეთის დე ფაქტო რესპუბლიკის ხელისუფლების წარმომადგენელთან, რუსლან ქიშმარიასთან ერთად მოინახულა.
