უკრაინის პრეზიდენტმა, ვოლოდიმირ ზელენსკიმ, განაცხადა, რომ 10 სექტემბრის ღამეს პოლონეთის მიმართულებით 92 რუსული დრონი მიფრინავდა, თუმცა უკრაინამ მათი უმეტესობა თავის საჰაერო სივრცეში ჩამოაგდო.
პრეზიდენტმა აღნიშნა, რომ კრემლის ლიდერი ვლადიმირ პუტინი ევროპის ჰიბრიდულ თავდასხმებზე რეაგირების შესაძლებლობას ცდის. ზელენსკის თქმით, მან შეძლო შემოწმება, რომ ევროპელებს ჯერ არ აქვთ საკუთარი ცის დაცვის უნარი თანამედროვე რუსული დრონებისგან.
„მაგალითად, ავიღოთ ერთი პოლონური შემთხვევა. პოლონეთში 92 დრონი მიფრინავდა. ჩვენ ყველა ჩამოვაგდეთ. 19-მა იქამდე მიაღწია. დიახ, ჩვენ ისინი უკრაინის ტერიტორიის თავზე ჩამოვაგდეთ, რა თქმა უნდა. შეიძლება ითქვას, რომ ისინი ჩვენსკენ მოფრინავდნენ, მაგრამ ჩვენ ვხედავთ მიმართულებას და, როგორც ამბობენ, ამ ფრენის ქორეოგრაფიას. ამიტომ, ჩვენ ვფიქრობთ, რომ 92 მიფრინავდა. ჩვენ ყველა ჩამოვაგდეთ. მიგვაჩნია, რომ 19-მა მიაღწია. ოთხი პოლონელებმა ჩამოაგდეს.“
ზელენსკიმ დასძინა, რომ ის არ ადარებს უკრაინისა და პოლონეთის არმიების ძლიერ მხარეებს, რადგან უკრაინა ომშია, პოლონეთი - არა.
პრეზიდენტმა აღნიშნა, რომ უკრაინა მზადაა გაუზიაროს საკუთარი გამოცდილება რუსული დრონების წინააღმდეგ ბრძოლაში.
„ჩვენ რამდენიმე ქვეყანას სიგნალი გავუგზავნეთ... ზოგიერთ ქვეყანაში ჩვენს ხალხს გავგზავნით... ზოგიერთი ქვეყნის წარმომადგენლები უკრაინაში იქნებიან“, - განაცხადა ზელენსკიმ.
პრეზიდენტმა ასევე ჩამოთვალა ის ქვეყნები, რომელტა საჰაერო სივრცე უცნობმა დრონებმა დაარღვიეს და მიანიშნა, რომ რუსეთი ამით ამ ქვეყნების საზოგადოების განწყობას ცდის.
„ვხედავთ ნორვეგიას, დანიას. მგონი, დღეს დილით შვედეთიდან სიგნალები მოდის. რუმინეთი, პოლონელები, ბალტიისპირეთის ქვეყნები. ის ამოწმებს, რა აქვთ ევროპელებს.“
და მეორეც, დარწმუნებული ვარ, რომ ის [პუტინი] ზამთრის წინ სიგნალებს იძლევა, რათა უკრაინასთან ძალიან ახლოს მყოფმა ქვეყნებმა იგრძნონ, რა ხდება საზოგადოებაში და რამდენად მზად არიან ისინი [უკრაინის] მხარდაჭერის გასაგრძელებლად“, - აღნიშნა ზელენსკიმ.
