აშშ-ის პრეზიდენტმა დონალდ ტრამპმა გამოთქვა სურვილი, რომ თურქეთმა შეწყვიტოს რუსეთიდან ნავთობის შესყიდვა, ვიდრე რუსეთი უკრაინის წინააღმდეგ აგრესიას აგრძელებს.
„მსურს, რომ თურქეთმა შეწყვიტოს რუსეთიდან ნავთობის შეძენა ვიდრე რუსეთი უკრაინის წინააღმდეგ აგრესიას აგრძელებს“, - განაცხადა ტრამპმა თეთრ სახლში გამართულ პრესკონფერენციაზე თურქეთის პრეზიდენტ რეჯეფ თაიფ ერდოღანათან შეხვედრისას.
ამასთან, დონალდ ტრამპმა განაცხადა, რომ ვლადიმირ პუტინი „უნდა შეჩერდეს“.
მისი თქმით, რუსეთმა მილიონობით დოლარი დახარჯა ბომბებზე, რაკეტებსა და ადამიანების სიცოცხლეზე, მაგრამ უკრაინის ტერიტორიაზე პროგრესს ფაქტობრივად ვერ მიაღწია.
მან ასევე ხაზი გაუსვა თურქეთის შესაძლებლობას, გავლენა მოახდინოს უკრაინაში მიმდინარე მოვლენებზე.
„ყველა პატივს სცემს ერდოღანს და მეც პატივს ვცემ მას. მას შეუძლია დიდი გავლენა მოახდინოს უკრაინაში ომის მიმდინარეობაზე, თუ მოისურვებს, მაგრამ ნეიტრალიტეტის შენარჩუნებას ამჯობინებს“, - აღნიშნა ტრამპმა და დასძინა, რომ თურქეთის პრეზიდენტი მთელ მსოფლიოში, მათ შორის უკრაინასა და რუსეთში, უდიდესი პატივისცემით სარგებლობს.
