ამერიკული ტელეარხი ABC-მ ეთერში დააბრუნა ჯიმი კიმელის გადაცემა - Jimmy Kimmel Live-ს, რომელიც რამდენიმე დღის წინ შეჩერდა წამყვანის, ჯიმი კიმელის, მიერ კონსერვატორი აქტივისტის, ჩარლი კირკის მკვლელობასთან დაკავშირებით გაკეთებული კომენტარების გამო.
Disney-ს მფლობელობაში არსებულმა ტელეკომპანია ABC-მ ჯიმი კიმელის შოუ - Jimmy Kimmel Live ეთერიდან გასულ კვირას მოხსნა.
„გასულ შაბათ-კვირას ახალ დაბალ დონეს მივაღწიეთ, MAGA-ს ბანდა სასოწარკვეთით ცდილობს ის ბავშვი, ვინც ჩარლი კირკი მოკლა, ერთ-ერთ მათგანად არ წარმოადგინოს. ყველაფერს აკეთებენ, რომ ამით პოლიტიკური ქულები დაიწერონ“, - განაცხადა მაშინ კიმელმა.
კიმელის კომენტარების შემდეგ აშშ-ის ფედერალური კომუნიკაციების კომისიის თავმჯდომარემ, ბრენდან ქარიმ ადგილობრივ მაუწყებლებს მოუწოდა, რომ Jimmy Kimmel Live-ის პირდაპირ ეთერში გაშვება შეეწყვიტათ, წინააღმდეგ შემთხვევაში კომისია გამოძიებას დაიწყებდა და მაუწყებლებს შეიძლება ლიცენზია დაეკარგათ.
ეთერში შოუს დაბრუნების გადაწყვეტილება კიმელთან ინტენსიური მოლაპარაკებების შემდეგ მიიღეს.
