მოლდოვის პრემიერ-მინისტრმა დორინ რეჩანმა განაცხადა, რომ რუსეთი მხარს უჭერს მოლდოვაში კრიმინალურ დაჯგუფებებს, რათა ხელში ჩაიგდოს ძალაუფლება და სახელმწიფოს სათავეში დამნაშავეები მოიყვანოს.
რეჩანმა აღნიშნა, რომ პრორუსული ძალები ღიად აცხადებენ, რომ ხელისუფლებაში მოსვლის შემთხვევაში დამნაშავეებს გაათავისუფლებენ.
„გაქცეულებს, რომლევიც დღეს იმალებიან, სახლში დაბრუნება შეეძლებათ და ჩვენი მოწინააღმდეგეები პურითა და მარილით დახვდებიან. ისინი, ვინც წლების განმავლობაში ძარცვავდნენ მოლდოვას, დაუბრუნდებიან თავიანთ თანამდებობებს მინისტრებისა და მოადგილეების რანგში“, - აღნიშნა მან.
რეჩანის თქმით, ამ ბანდიტებს მოქალაქეები არ აირჩევენ: „მათ კრემლი, მათი სამეთაურო ცენტრიდან დანიშნავს“.
„ვის შეუძლია დღეს გარანტიის გაცემა, რომ პრორუსული უმრავლესობა არ დანიშნავს შორს პრემიერ-მინისტრად, პლატონს ფინანსთა მინისტრად, ტკაციუკს განათლების მინისტრად და ვლაჰს საგარეო საქმეთა მინისტრად? ეს ცუდი ხუმრობა იქნებოდა, ასეთი სერიოზული რისკი რომ არ არსებობდეს“, - თქვა რეჩანმა.
მან მოუწოდა მოქალაქეებს, 28 სექტემბერს არჩევნებზე მისვლისას საკუთარ თავს ჰკითხონ, რა სურთ სინამდვილეში მოლდოვასთვის.
„ჩვენ მხოლოდ ორი ვარიანტი გვაქვს: ან პრორუსულ უმრავლესობის პარლამენტში შესვლის უფლება მივცეთ, რაც ყველა დამნაშავეს ხელისუფლებაში დააბრუნებს, ან გავაგრძელოთ სასამართლო სისტემის გაწმენდა ისე, რომ დამნაშავეები იქ აღმოჩნდნენ, სადაც მათი ადგილია - ციხეში, კანონით და მოპარული ფულის ხალხისთვის დაბრუნებით“, - განაცხადა მოლდოვის პრემიერ-მინისტრმა.
