ფინეთის პრეზიდენტმა ალექსანდრ სტუბმა განაცხადა, რომ უკრაინის უსაფრთხოების გარანტიები მოიცავს ევროპის სახელმწიფოების მზადყოფნას რუსეთის წინააღმდეგ სამხედრო წინააღმდეგობისთვის, თუ მოსკოვი უკრაინაზე თავდასხმას სამშვიდობო შეთანხმების შემდეგ განაახლებს.
მისი აზრით, „რუსეთს არ ექნება ვეტოს უფლება“ ამ გარანტიების ფორმატზე.
„უსაფრთხოების გარანტიები, არსებითად, შემაკავებელი ფაქტორია. ეს შემაკავებელი ფაქტორი დამაჯერებელი უნდა იყოს და იმისათვის, რომ დამაჯერებელი იყოს, ძლიერი უნდა იყოს“, - განაცხადა სტუბმა The Guardian-თვის მიცემულ ინტერვიუში.
მან განაცხადა, რომ გარანტიები ძალაში მხოლოდ უკრაინასა და რუსეთს შორის მომავალი შეთანხმების შემდეგ შევა, თუმცა ხაზგასმით აღნიშნა, რომ რუსეთს მათ ფორმატზე ვეტოს უფლება არ ექნება.
„რუსეთს აბსოლუტურად არ აქვს ხმის უფლება დამოუკიდებელი სახელმწიფოს სუვერენულ გადაწყვეტილებებისთვის... ამიტომ, ჩემთვის საკითხი არ დგას, დათანხმდება თუ არა რუსეთი. რა თქმა უნდა, ისინი არ დათანხმდებიან, მაგრამ ეს არ არის მთავარი“, - განაცხადა სტუბმა.
სტუბმა აღნიშნა, რომ რუსეთის ლიდერის, ვლადიმირ პუტინის მოლაპარაკებებში ჩართვის შანსი მცირეა.
ეს ომი მისთვის მეტად მნიშვნელოვანია, რომ მან ის არ წააგოს. მან, თანამედროვე ისტორიაში, განსაკუთრებით ცივი ომის დასრულების შემდეგ, ყველაზე დიდი სტრატეგიული შეცდომა დაუშვა და ყველა სტრატეგიული მიზნის მიღწევაში წარუმატებლობა განიცადა. საკითხი დგას, როდის დაჯდება ის მოლაპარაკებების მაგიდასთან, იმედია, უფრო ადრე, ვიდრე გვიან, მაგრამ ახლა მე საკმაოდ პესიმისტურად ვარ განწყობილი,“ - აღნიშნა სტუბმა.
