უკრაინის პრეზიდენტმა ვოლოდიმირ ზელენსკიმ ესტონეთის საჰაერო სივრცის დარღვევა დასავლეთის სახელმწიფოების დესტაბილიზაციისკენ მიმართული უფრო ფართო რუსული კამპანიის ნაწილად შეაფასა.
„რუსეთის დესტაბილიზაცია ახალ ქვეყნებსა და მიმართულებებზე ვრცელდება. ის ყველა ინსტრუმენტს იყენებს, პოლიტიკურ პროცესებში ჩარევიდან, როგორც ეს რუმინეთსა და მოლდოვაში მოხდა, საჰაერო სივრცის დარღვევით დამთავრებული, როგორც ეს პოლონეთში, რუმინეთში და ახლა ესტონეთში მოხდა“, - თქვა მან.
ზელენსკის თქმით, ასეთი ქმედებები შემთხვევითობა არ არის, არამედ ეს არის „სისტემური რუსული კამპანია ევროპის, ნატო-ს, დასავლეთის წინააღმდეგ. და ეს სისტემურ რეაგირებას მოითხოვს. საჭიროა ძლიერი ქმედებები - როგორც ერთობლივად, ასევე თითოეული ქვეყნის მხრიდან.
რუსეთმა საერთაშორისო ზეწოლის შედეგად მზარდი ტკივილი უნდა განიცადოს, პირველ რიგში ეკონომიკის მხრივ, და სანქციები ამის მიღწევის საუკეთესო გზაა“, - აცხადებს ზელენსკი.
ზელენსკიმ ასევე აღნიშნა, რომ ომში რუსეთის დანაკარგებიც უნდა გაიზარდოს, „რაც ძლიერი უკრაინული არმიის წყალობით შეიძლება იქნას მიღწეული“.
