რაც უფრო შორს იქნებიან ამ ტიპის ბიუროკრატები, მით უკეთესი ჩვენი ქვეყნისთვის, ჩვენი ხალხისა და ამ ქვეყნის მომავლისთვის,- ასე შეაფასა დედაქალაქის მერმა კახა კალაძემ ის ფაქტი, რომ ევროკომისარი მარტა კოსი სამხრეთ კავკასიაში ტურნეს ფარგლებში საქართველოს არ ეწვევა.
კახა კალაძის განმარტებით, მსგავსი გადაწყვეტილებები განპირობებულია იმით, რომ საქართველოს ხელისუფლება „არ დაემორჩილა მათ შანტაჟსა და მუქარას მეორე ფრონტის გახსნასა და რუსეთისთვის სანქციების დაწესებასთან დაკავშირებით“.
„ქვეყანა არ დაემორჩილა მათ მოთხოვნებს, ქვეყანა არ დაემორჩილა მათ შანტაჟს, მუქარებს, შეურაცხყოფებს, რომ ჩავრთულიყავით ომში, გაგვეჩაღებინა მეორე ფრონტი, ქვეყანა მიერთებოდა სანქციებს, რომლებიც დამღუპველი იქნებოდა ეკონომიკურად და კატასტროფის მომტანი იქნებოდა ჩვენი ქვეყნისთვის. არ დავემორჩილეთ, იმიტომ, რომ სისულელეებს არ გავაკეთებთ - საკუთარ ქვეყანას, საკუთარ ხალხს და საკუთარ თავს არ დავიზიანებთ. ჩვენ უდიდესი პასუხისმგებლობა გვაქვს აღებული ქართველი ხალხის წინაშე. ეს ყველამ კარგად უნდა დაიმახსოვროს და გაითავისოს, რომ ქართველი ხალხის წინაშე გვაქვს აღებული ვალდებულება და არა ვიღაცების წინაშე გარედან, როგორც მათ აქვთ სურვილი. ქართველი ხალხი არის ამ ქვეყნის ბატონ-პატრონი. შესაბამისად, ჩვენ ვალდებულება გვაქვს, პირველ რიგში, რომ ამ ქვეყნის ინტერესი დავიცვათ და ქართველი ხალხის ინტერესები დავიცვათ და ეს ადამიანები აგრძელებენ შეურაცხყოფებს, ცილისწამებას, მუქარას, შანტაჟს, რის გამო?! - იმის გამო, რომ ჩვენ ხარაკირი არ გავიკეთეთ“, - განაცხადა კალაძემ.
